Спорт тадбирлари, хусусан, футбол учрашувлари вақтида иштирокчилар ва томошабинлар хавфсизлигини таъминлаш энг устувор вазифалардан бири саналади.

Бунда айниқса, футбол клуби тизимида фаолият олиб бораётган хавфсизлик бўйича офицерлар ўз вазифаларини тўлақонли бажаришлари лозим бўлади.

ЎзПФЛ ўтган йилдан эътиборан ҳар мавсум аввалида клубларнинг хавфсизлик офицерлари учун ўқув-семинари ташкил этишни йўлга қўйди.

Бугун 2022 йилги мавсум олдидан клублар хавфсизлик бўйича офицерларининг хизмат вазифалари, уларга қўйиладиган талаблар, ўйин олдидан ва учрашув давомида стадион ҳудудида хавфсизлик қоидаларига тўла риоя этилишини таъминлаш, айниқса пандемия шароитида эътибор қаратиш лозим бўлган жиҳатларга бағишлаб ЎзПФЛда Суперлига ҳамда Про лига клублари хавфсизлик бўйича офицерлари учун махсус семинар ташкил этилди.

Унда ЎзПФЛ, ЎФА, Ички ишлар органлари ва Миллий гвардиянинг жамоат тартибини сақлаш бўйича масъуллари ҳам иштирок этиб, ўтган мавсум бу борада амалга оширилган ишлар сарҳисобини бажарган ҳолда олдиндаги мавсум учун умумий режалар муҳокама қилинди.

Семинарда хавфсизлик бўйича офицернинг хизмат вазифалари, уларнинг ўйинни хавфсиз ва барча қонун-қоидаларга мос равишда ўтишидаги аҳамияти муҳокама этилди. Ҳар бир клуб уй учрашувларини ўтказадиган стадионда хавфсизлик режаси ишлаб чиқилган бўлиши лозим экани, ўйин давомида клуб вакили айнан мана шу режа асосида жамоат тартибини сақлаш бўйича Ички ишлар органлари ва Миллий гвардия билан яқин ҳамкорликда ишлаши тушунтирилди.