Мана, ниҳоят, Суперлига-2022 стартига ҳам етиб келдик. Барчамиз орзиқиб кутган янги мавсум кучли «интрига» тақдим этиши башорат қилинмоқда. Шунинг баробарида иштирокчи клублар кўплаб юбилей кўрсаткичлар, натижаларни нишонлайди, албатта. Марҳамат, қуйида Суперлига-2022да қайд этилиши кутилаётган «юмалоқ» рақамларга эътибор қаратишингиз мумкин.
«ПАХТАКОР»
* «Шерлар» миллий чемпионат ҳисобидан 2000-голни нишонлашга яқинлар. Улар бунинг учун яна 15та гол урсалар, бас.
* «Пахтакор» бу йил чем-пионатда 900та ўйин маррасига етади. Аниқроғи, Суперлигадаги 20-учрашувида.
* «Пахтакорчилар» бу йилги мавсумда 2000-очкони расмийлаштириш имкониятига эгалар. Ҳозир бу маррагача 50 очко бор.
«СЎҒДИЁНА»
* Жиззах клубини чемпионатда юбилей - 1000-голдан атиги 38та аниқ зарба ажратиб турибди. Демак, ўтган мавсум рақиблар дарвозасини ишғол қилишда камтарона кўрсаткич билан (жами 26та гол) 2-ўринни эгаллаган «Сўғдиёна» «юмалоқ» рақамга етиш учун маҳсулдорликни ошириши керак.
* «Сўғдиёна» шунинг баробарида Суперлиганинг яна 5та ўйинида очколарни рақиблар билан бўлишиб олса, жамоанинг жами дуранглари сони 150та бўлади.
АГМК
* Олмалиқ жамоаси мамлакат чемпионати элит лигасида 15-мавсумни қарши олмоқда.
* АГМК Суперлига доирасида яна 10 марта майдонга тушса, 400та ўйин маррасини забт этади.
* Жамоанинг 150-ғалабасига яна 5та ютуқ керак.
* АГМК шунингдек, 90-дурангни қайд этади агар 5та учрашувни муроса кўчасида тугатса.
«НАСАФ»
* Қаршиликлар чемпионатнинг старт қисмидаёқ элит лига ҳисобидан 400-ғалабани нишонлаш имкониятига эгалар. Уларни бу маррадан атиги 2та ютуқ ажратиб турибди.
* Яна 5та ўйиндаги тенг ҳисоб «Насаф» статистикасига 150-дуранг сифатида ёзилади.
* «Насаф»нинг 1300-голига атиги 10та аниқ зарба керак. Қарши клуби элит лигадаги голлар сони бўйича фақат «Пахтакор», «Нефтчи» ва «Навбаҳор»дан ортда, холос.
«БУНЁДКОР»
* «Бунёдкор» янги мавсумдаги 31та аниқ зарба билан чемпионат ҳисобидан 800та гол маррасини забт этади.
* Жамоа яна 5та баҳсда муроса кўчасини танласа, 90та дуранг кўрсаткичи қайд этилади.
* «Бунёдкор» юқори лигада 900та очко маррасига ҳам яқин. Ҳозирча бунга 17 очко етмаяпти.
«НАВБАҲОР»
* Наманган клуби Суперлига 1-турида «Насаф»ни енга олса, унинг чемпионат тарихида жамлаган жами очколари сони 1400тага етади.
* Худди «Пахтакор» каби «Навбаҳор» учун ҳам янги мавсумдаги 20-учрашув умумий ҳисобда 900-ўйин бўлади. Хуллас, Ўзбекистон чемпионати элит лигасининг барча мавсумларида фақат шу икки клуб иштирок этган.
«ЛОКОМОТИВ»
* «Темирйўлчилар» янги мавсумда чемпионат ҳисобидан 500-ўйинни нишонлашади. Бунинг учун яна 24та учрашув керак.
* «Локомотив»нинг янги мавсумдаги 20-ютуқли ўйини жамоа ҳисобига 250-ғалаба сифатида ёзилади.
* «Темирйулчилар» яна рақиб дарвозасига 28 марта йўл топишса, жами голларининг сони 800та бўлади.
«ҚЎҚОН-1912»
* Қўқонликлар бу йил 500-ўйинни нишонлашади. Бу маррага 20та учрашув қолди.
* «Қўқон-1912» тез орада чемпионат доирасида 600-очкони расмийлаштириши мумкин. Айни пайт жамоа ҳисобида 599 очко бор.
«ҚИЗИЛҚУМ»
Яққол кутилаётган юбилей кўрсаткичлар йўқ.
«СУРХОН»
Яққол кутилаётган юбилей кўрсаткичлар йўқ.
«МЕТАЛЛУРГ»
* Бекобод жамоаси элит лигада 700-ўйинни ўтказади. Айни пайт унинг ҳисобида 694та ўйин бор, демак, яна 6та керак.
«НЕФТЧИ»
* Суперлигага қайтган «Нефтчи» мамлакат чемпионати юқори дивизионида 1600-голни нишонлаш учун бу йил рақиблар дарвозасини 34 марта ишғол қилиши керак.
«ДИНАМО»
* Яна бир эски-янги дебютантни элитадаги 250-ғалабадан атиги 9та ўйиндаги ижобий натижа ажратиб турибди.
«ОЛИМПИК»
* «Олимпик» Ўзбекистон чемпионати юқори лигаси тарихига 41-иштирокчи сифатида киради.
Сергей КНЯЗЕВ
