Mana, nihoyat, Superliga-2022 startiga ham yetib keldik. Barchamiz orziqib kutgan yangi mavsum kuchli «intriga» taqdim etishi bashorat qilinmoqda. Shuning barobarida ishtirokchi klublar ko‘plab yubiley ko‘rsatkichlar, natijalarni nishonlaydi, albatta. Marhamat, quyida Superliga-2022da qayd etilishi kutilayotgan «yumaloq» raqamlarga e’tibor qaratishingiz mumkin.
«PAXTAKOR»
* «Sherlar» milliy chempionat hisobidan 2000-golni nishonlashga yaqinlar. Ular buning uchun yana 15ta gol ursalar, bas.
* «Paxtakor» bu yil chem-pionatda 900ta o‘yin marrasiga yetadi. Aniqrog‘i, Superligadagi 20-uchrashuvida.
* «Paxtakorchilar» bu yilgi mavsumda 2000-ochkoni rasmiylashtirish imkoniyatiga egalar. Hozir bu marragacha 50 ochko bor.
«SO‘G‘DIYONA»
* Jizzax klubini chempionatda yubiley - 1000-goldan atigi 38ta aniq zarba ajratib turibdi. Demak, o‘tgan mavsum raqiblar darvozasini ishg‘ol qilishda kamtarona ko‘rsatkich bilan (jami 26ta gol) 2-o‘rinni egallagan «So‘g‘diyona» «yumaloq» raqamga yetish uchun mahsuldorlikni oshirishi kerak.
* «So‘g‘diyona» shuning barobarida Superliganing yana 5ta o‘yinida ochkolarni raqiblar bilan bo‘lishib olsa, jamoaning jami duranglari soni 150ta bo‘ladi.
AGMK
* Olmaliq jamoasi mamlakat chempionati elit ligasida 15-mavsumni qarshi olmoqda.
* AGMK Superliga doirasida yana 10 marta maydonga tushsa, 400ta o‘yin marrasini zabt etadi.
* Jamoaning 150-g‘alabasiga yana 5ta yutuq kerak.
* AGMK shuningdek, 90-durangni qayd etadi agar 5ta uchrashuvni murosa ko‘chasida tugatsa.
«NASAF»
* Qarshiliklar chempionatning start qismidayoq elit liga hisobidan 400-g‘alabani nishonlash imkoniyatiga egalar. Ularni bu marradan atigi 2ta yutuq ajratib turibdi.
* Yana 5ta o‘yindagi teng hisob «Nasaf» statistikasiga 150-durang sifatida yoziladi.
* «Nasaf»ning 1300-goliga atigi 10ta aniq zarba kerak. Qarshi klubi elit ligadagi gollar soni bo‘yicha faqat «Paxtakor», «Neftchi» va «Navbahor»dan ortda, xolos.
«BUNYODKOR»
* «Bunyodkor» yangi mavsumdagi 31ta aniq zarba bilan chempionat hisobidan 800ta gol marrasini zabt etadi.
* Jamoa yana 5ta bahsda murosa ko‘chasini tanlasa, 90ta durang ko‘rsatkichi qayd etiladi.
* «Bunyodkor» yuqori ligada 900ta ochko marrasiga ham yaqin. Hozircha bunga 17 ochko yetmayapti.
«NAVBAHOR»
* Namangan klubi Superliga 1-turida «Nasaf»ni yenga olsa, uning chempionat tarixida jamlagan jami ochkolari soni 1400taga yetadi.
* Xuddi «Paxtakor» kabi «Navbahor» uchun ham yangi mavsumdagi 20-uchrashuv umumiy hisobda 900-o‘yin bo‘ladi. Xullas, O‘zbekiston chempionati elit ligasining barcha mavsumlarida faqat shu ikki klub ishtirok etgan.
«LOKOMOTIV»
* «Temiryo‘lchilar» yangi mavsumda chempionat hisobidan 500-o‘yinni nishonlashadi. Buning uchun yana 24ta uchrashuv kerak.
* «Lokomotiv»ning yangi mavsumdagi 20-yutuqli o‘yini jamoa hisobiga 250-g‘alaba sifatida yoziladi.
* «Temiryulchilar» yana raqib darvozasiga 28 marta yo‘l topishsa, jami gollarining soni 800ta bo‘ladi.
«QO‘QON-1912»
* Qo‘qonliklar bu yil 500-o‘yinni nishonlashadi. Bu marraga 20ta uchrashuv qoldi.
* «Qo‘qon-1912» tez orada chempionat doirasida 600-ochkoni rasmiylashtirishi mumkin. Ayni payt jamoa hisobida 599 ochko bor.
«QIZILQUM»
Yaqqol kutilayotgan yubiley ko‘rsatkichlar yo‘q.
«SURXON»
Yaqqol kutilayotgan yubiley ko‘rsatkichlar yo‘q.
«METALLURG»
* Bekobod jamoasi elit ligada 700-o‘yinni o‘tkazadi. Ayni payt uning hisobida 694ta o‘yin bor, demak, yana 6ta kerak.
«NEFTCHI»
* Superligaga qaytgan «Neftchi» mamlakat chempionati yuqori divizionida 1600-golni nishonlash uchun bu yil raqiblar darvozasini 34 marta ishg‘ol qilishi kerak.
«DINAMO»
* Yana bir eski-yangi debyutantni elitadagi 250-g‘alabadan atigi 9ta o‘yindagi ijobiy natija ajratib turibdi.
«OLIMPIK»
* «Olimpik» O‘zbekiston chempionati yuqori ligasi tarixiga 41-ishtirokchi sifatida kiradi.
Sergey KNYAZEV
