"Интер" ҳимоячиси Стефан де Врей фаолиятини Англия Премьер-лигасида давом эттириши мумкин. 30 ёшли футболчининг хизматларига "Тоттенхэм" қизиқиш билдирмоқда, деб хабар беради Inter Live.
Манбага кўра, инглиз клуби футболчига мавсумига 6,5 миллион евро маош билан 4 йиллик шартнома таклиф қилишга тайёр. Италия клуби ҳимоячини 25-30 миллион еврога сотиши мумкин.
30 ёшли де Врей 2018 йилдан буён Италиянинг амалдаги чемпионатида тўп сурмоқда, у жамоага эркин агент сифатида қўшилган. Италия А сериясининг бу мавсумида нидерландиялик футболчи 21 учрашувда майдонга тушган. Ҳимоячининг "нерадзуррилар" билан амалдаги шартномаси 2023 йилда якунига этади. Transfermarkt маълумотларига кўра, Де Врейнинг бозор қиймати 50 миллион еврога баҳоланган.
