Кеча бўлиб ўтган “Машъал-Академия” ва “Орол” ўртасидаги ўйидан сўнг ҳар иккала жамоа бош мураббийларининг фикрлари билан қизиқдик.

Дилшод Андаев («Машъал-А») бош мураббийи:
- Бугун ўйиндан ҳам, ҳисобдан ҳам қониқдим. Агар имкониятлардан тўлиқ фойдаланганимизда йирик ҳисобда ғалаба қозонишимиз ҳам мумкин эди. «Орол» жамоаси устидан жамоавий ўйин эвазига ютуққа эришдик деб ўйлайман.

- Қайси футболчиларнинг ҳаракати маъқул келди?
- Ҳимоя чизиғимизда тўп сурган Акбар Ҳотамов, Тимур Дубровский, Маъмур Абдуллаев ва Юнус Очилдиевларнинг ўйини яхши чиқди. Ярим ҳимояда тўп сурган Руслан Муродиллаевнинг эса ўйини қовушмади.

- Ягона гол муаллифи Шохруҳ Достонов ҳақида фикрингиз?
- У ўзига берилган имкониятдан фойдаланиб гол урди. Лекин баҳс охирида қизил карточка олгани роса асабга ўйнади. Энди Достонов кейинги учрашувни ўтказиб юборади.

Неъматулло Қутибоев («Орол» жамоаси бош мураббийи):
- Бугун негадир ўйинимиз қовушмади. Аввалги учрашувларда шогирдларим яхши ҳаракат қилишганди, аммо бу ўйинда балки об-ҳаво иссиқлиги учундир ҳеч омад келмади. Агар охиригача курашганимизда бир очко олишимиз мумкин эди. Лекин ўйиннинг охирги 15 дақиқасида шогирдларим бироз толиқиб қолишди.

- «Машъал-Академия» тўғрисида фикрингиз?
- Бу жамоа ўтган йил ҳам менда илиқ таассурот қолдирганди. Уларда уч-тўрт йилдан бери шу жамоада тўп суриб келаётган ўйинчилар бор. Биз эса шу йил бошида янги жамоа туздик.

- «Орол» олдига қандай вазифа қўйилган?
- Кучли саккизликка кириб кейинги босқичга йўл олиш.

- Нега жамоанинг номи «Нукус»дан «Орол»га ўзгарди?
- Менимча, бунинг сабабини клубимиз раҳбарларидан сўраганингиз маъқул. Раҳбарият ўзаро маслаҳатлашган ҳолда жамоани «Орол» деб номлашга қарор қилди.