Хабарингиз бор, “Navruz Cup-2022” мусобақасида Тожикистон терма жамоаси ҳам иштирок этмоқда. Тожикистонликлар мазкур турнирнинг ярим финалида Уганда термасига қарши майдонга тушиб, пенальтилар сериясида 5:4 ҳисобида имкониятни бой беришди.

“Навбаҳор” шарафини ҳимоя қилаётган маҳоратли ярим ҳимоячи Эҳсони Паншанбе ҳам Тожикистон термаси таркибида Намангандаги кичик мусобақада қатнашяпти. У мамлакат футбол федерацияси матбуот хизматига Угандага қарши ўйин борасида шундай деди:

“Navruz Cup-2022” ярим финалида Уганда термасига қарши кечган учрашувда Наманганга келиб, бизни қўллаб-қувватлаган мухлисларимизга миннатдорчилик билдираман. “Навбаҳор” ишқибозларига ҳам бизни қўллаб туришгани учун раҳмат.

Ўйин тўғрисида гапирсам, тўпни назорат қилишда ҳам, вазиятлар яратиш борасида ҳам рақибдан устунлик қилдик. Пенальтилар серияси лотерея ҳисобланади. Пенальтидан фойдалана олмаган йигитларимизни қўллаб-қувватлайман. Биз барчамиз бир жамоамиз. Шундай экан, бирга ғалаба қозонамиз ва бирга мағлуб бўламиз", — деди тожикистонлик футболчи.