Ўзбек футболига ҳисса қўшаётган инсонлар кўплаб топилади. Миллионлар ўйинига мутахассислар, мураббий, футболчилар, ҳакамлар, журналистлар, мухлислар ўзига хос ҳисса қўшиб келмоқдалар. Сўнгги йилларда футбол журналистикаси бошқа соҳа журналистикаси нисбатан илғор ривожланганини кўпчилик таъкидламоқда.
Ана шундай ҳамкасбларимиз орасида бир устозимиз борки, уни қўрқмасдан фидойи инсон дея оламиз. "Спорт" канали директори ҳисобланган Давлат Турдалиев бугун ўзининг 50 ёшли таваллуд айёмини нишонламоқда. Умрининг катта қисмини спорт журналистикасига, шарҳловчиларни тайёрлашга сарфлаган устозимизни фурсатдан фойдаланиб, муборакбод этамиз.
Тан олиш керак, Давлат ака "Спорт" канали раҳбари лавозимига келгандан кейин, телеканал бевосита ўзининг йўналиши бўйича тўлақонли ишлай бошлади. "Спорт"нинг ранг-баранглиги ошди. Телеканал айнан Давлат Турдалиевнинг ташаббуси билан 24 соатли иш режимига ўтганини алоҳида таъкидлаш лозим.
Ҳурматли Давлатжон Охунович!
Фурсатдан фойдаланиб, ўзини сизга шогирд ҳисоблайдиган бир гуруҳ спорт журналистлари ва мухлисларнинг самимий табригини қабул қилинг. Узоқ йиллар давомида футболга, футбол журналистикасига ҳисса қўшиб келдингиз. Ўзбек футболининг энг чўққига чиққанини, хусусан миллий терма жамоамизнинг Жаҳон йўлланмани қўлга киритганини кўриш насиб қилсин. Умрингиз узоқ, толеингиз янада баланд бўлсин!
"Стадион" газетаси ва www.stadion.uz сайти ижодкорлари
