Ўзбекистон Кубоги 1-туридан ўрин эгаллаган “Металлург” – “Бунёдкор” (2:4) учрашувидан кейин “қалдирғочлар” катта мураббийи Виктор Карпенко фикрлари билан ўртоқлашди.

- Муросасиз учрашув гувоҳига айландик. 6 та гол, 2 та четлатиш. Ўйлайманки, учрашув мухлисларга ёқди. Икки жамоа ҳам ғалаба учун борини берди. Кўпроқ бизга омад кулиб боқди. “Металлург”га кейинги ўйинларда омад тилайман! Биз уй ўйинми, меҳмон ўйинми, ажратмаймиз. Ҳар бирига жиддий ёндашамиз. Фақат ғалаба учун майдонга тушамиз. Бугун ротацияга қўл урдик. Кўпчиликка имконият бердик. Ҳеч ким таркибдан тушиб қолмади. Биз бир жамоамиз ва 23 футболчи ўйнашга қодир. Асосий таркиб, иккинчи таркиб сифатида ажратмаймиз. Ҳар бир футболчи саралаб олинган ва ҳар қандай вақтда жамоа сафида ўйнаши мумкин бўлади" - деди Карпенко.