Европа чемпионлар лигасининг чорак финал босқичидан ўрин олган навбатдаги 2та жавоб ўйини кеча бўлиб ўтди. Журналист Даврон Файзиев мазкур ўйинларга қисқача шарҳ берди.

"Ливерпуль" - "Бенфика" — 3:3 (дастлабки ўйин — 3:1)

Голлар кўп. Интрига йўқ. "Ливерпуль" меҳмондаги 3:1 ғалабадан кейин куч тежади, ротация қилди. Клопп Салоҳ, Мане, ван Дейкларга дам берди. "Бенфика" асосан ҳисобда қувди. Конате урди, Гонсалу жавоб берди. Кейин Фирмино дубль билан ўзини эслатди. Якунда катта устунликдан кейин мезбонлар тежамкор режимга ўтди. "Бенфика" бундан фойдаланиб, Яремчук ва Нуньес голлар уришди, 3:3. Умумий 6:4 натижаси билан "Ливерпуль" яримфиналга чиқди ва "Вильярреал"ни синовдан ўтказади.

"Атлетико" - "Манчестер Сити" — 0:0 (дастлабки ўйин —0:1)

Таймлар икки хил бўлгани каби, ўйин кунлари ҳам фарқ қилади. Бир кун аввалги шоулардан сўнг бу сафар футболнинг бошқачароқ кўринишига гувоҳ бўлдик. "Манчестер Сити" жуда катта қийинчилик билан яримфиналга чиқди. "Атлетико" ўз уйида ботқоқ юзага келтирди. 1-таймда ҳимояланди, уддалади. 2-бўлимда ҳужумга ўтди, яқин келди, уролмади, натижада синдиришни бошлади. Қизил, жанжал, сариқлар… одатдагидек. "Сити" Симеоненинг қопқонларидан катта талофатлар билан бўлса ҳам омон чиқди. 0:0, ўша ўтган сафарги битта гол ҳаммасини ҳал қилди. Яримфиналда "Манчестер Сити" яна Мадрид билан ўйнайди. Бошқачароғи, ҳужумга мойилроғи. "Реал".