Yevropa chempionlar ligasining chorak final bosqichidan o‘rin olgan navbatdagi 2ta javob o‘yini kecha bo‘lib o‘tdi. Jurnalist Davron Fayziyev mazkur o‘yinlarga qisqacha sharh berdi.

"Liverpul" - "Benfika" — 3:3 (dastlabki o‘yin — 3:1)

Gollar ko‘p. Intriga yo‘q. "Liverpul" mehmondagi 3:1 g‘alabadan keyin kuch tejadi, rotasiya qildi. Klopp Saloh, Mane, van Deyklarga dam berdi. "Benfika" asosan hisobda quvdi. Konate urdi, Gonsalu javob berdi. Keyin Firmino dubl bilan o‘zini eslatdi. Yakunda katta ustunlikdan keyin mezbonlar tejamkor rejimga o‘tdi. "Benfika" bundan foydalanib, Yaremchuk va Nunyes gollar urishdi, 3:3. Umumiy 6:4 natijasi bilan "Liverpul" yarimfinalga chiqdi va "Vilyarreal"ni sinovdan o‘tkazadi.

"Atletiko" - "Manchester Siti" — 0:0 (dastlabki o‘yin —0:1)

Taymlar ikki xil bo‘lgani kabi, o‘yin kunlari ham farq qiladi. Bir kun avvalgi shoulardan so‘ng bu safar futbolning boshqacharoq ko‘rinishiga guvoh bo‘ldik. "Manchester Siti" juda katta qiyinchilik bilan yarimfinalga chiqdi. "Atletiko" o‘z uyida botqoq yuzaga keltirdi. 1-taymda himoyalandi, uddaladi. 2-bo‘limda hujumga o‘tdi, yaqin keldi, urolmadi, natijada sindirishni boshladi. Qizil, janjal, sariqlar… odatdagidek. "Siti" Simeonening qopqonlaridan katta talofatlar bilan bo‘lsa ham omon chiqdi. 0:0, o‘sha o‘tgan safargi bitta gol hammasini hal qildi. Yarimfinalda "Manchester Siti" yana Madrid bilan o‘ynaydi. Boshqacharog‘i, hujumga moyilrog‘i. "Real".