Кеча Эрон пойтахти Теҳронда шу йилнинг 21 сентябрь – 6 октябрь кунлари шу давлатда бўлиб ўтадиган 16 ёшгача бўлган футболчилар ўртасидаги Осиё чемпионатига қуръа ташлаш маросими бўлиб ўтди.
Қитъамизнинг аввалги чемпионати Тошкентда бўлиб ўтган ва унда Ўзбекистон ўсмирлар терма жамоаси финалда КХДРга 0:2 ҳисобида имокниятни бой берган, бироқ мусобақа якунларига кўра Жаҳон чемпионатига йўлланмани қўлга киритган эди.
Қитъанинг янги чемпионатида Ўзбекистон ўсмирлар терма жамоаси "D" гуруҳида Сурия, Хитой ва Ҳиндистон терма жамоаларига қарши кураш олиб борадиган бўлди.
Сир эмаски, қитъа чемпионатининг ярим финалига қадар етиб борган 4 терма жамоа ўсмирлар ўртасидаги Жаҳон чемпионатида иштирок этиш ҳуқуқини қўлга киритишади. Жаҳон чемпионати эса 2013 йилнинг 14 ноябрь – 6 декабрь кунлари БААнинг 7 шаҳарида бўлиб ўтади.
Ўзбекистон ўсмирлар терма жамоаси жой олган "D" гуруҳи вакиллари чорак финалда "С" зонаси етакчиларига қарши кураш олиб боради. "Ўлим гуруҳи", дея таъриф берилган "С" гуруҳидан амалдаги Осиё чемиони КХДР, шунингдек, Япония, Саудия Арабистони ва Жанубий Корея ўсмирлар терма жамоалари ўрин олишган. Қуйида барча гуруҳлар билан танишиб олишингиз мумкин:
"А" ГУРУҲИ: Эрон (мезбон), Кувайт, Яман, Лаос;
"В" ГУРУҲИ: Австралия, Ироқ, Уммон, Таиланд;
"С" ГУРУҲИ: КХДР, Япония, Саудия Арабистони, Жанубий Корея;
"D" ГУРУҲИ: Ўзбекистон, Сурия, Хитой, Ҳиндистон
