Трансфер бозори мутахассиси Жанлука Ди Марцио «Арсенал» ва «Тоттенхэм»ни «Бавария» ярим ҳимоячиси Серж Гнабрига асосий даъвогарлар деб атади. Шу билан бирга, Ди Марцио «Реал»ни футболчи учун курашдан четда қолдирди.

Гнабрининг Мюнхен клуби билан шартномаси келаси йил ёзида тугайди ва томонлар шартномани узайтириш борасида ҳалигача келишиб олишмаган. Ди Марционинг таъкидлашича, ёзда футболчи учун «Арсенал» ва «Тоттенхэм» кураш олиб бориши кутилмоқда.

Унинг қўшимча қилишича, «Реал» катта эҳтимол билан Антонио Рюдигер ва Килиан Мбаппенинг трансферларига эътибор қаратади.

Гнабри жорий мавсумда Бундеслигада 32 та ўйинда майдонга тушиб, 13 та гол урди ва 5 та голга ассистентлик қилди.