Италиянинг “Фиорентина” клуби сардори Рикардо Монтоливо келаси трансфер мавсуми очилиши билан “Милан” сафига ўтишини расман тасдиқлади.

Италия терма жамоси ярим ҳимоячиси сешанба куни Миланга ташриф буюрди ва ўз трансфери билан боғлиқ сўнгги масалаларни ҳал қилди.

Милан расмий сайтининг хабар беришича, футболчи пайшанба куни энг сўнгги тиббий текширувдан ўтиб бўлгач, клуб билан 4 йиллик шартномага имзо чекади.

Аҳамиятли жиҳати шундаки, истеъдодли ярим ҳимоячи “Милан”га текинга тушмоқда. Монтоливонинг “Фиорентина” билан шартномаси мавсум якунига етиши билан ўз кучини йўқотгани боис, у эркин агентга айланганди.