«Реал» «Ливерпуль»га қарши бўлиб ўтган Чемпионлар Лигаси финалидаги тартибсизликлар борасида баёнот берди.

«Реал»—«Ливерпуль» ўртасидаги ЕЧЛ финал баҳси тартибсизликлар туфайли 36 дақиқа кеч бошланди. Бир неча минг томошабин стадионга чиптасиз кириб кетгани, айрим чиптаси бор мухлислар эса арена ташқарисида қолиб кетгани айтилди. Франция ҳукумати «Ливерпуль» мухлисларини тартибсизликлар келтириб чиқаришда айблади. Ҳозирда бу борада текширув ишлари олиб борилмоқда.

"28 май куни «Стад де Франс» стадиони яқинида ва кираверишда, жумладан, стадион ичида содир бўлган кўнгилсиз вазиятни ҳисобга олиб, «Реал Мадрид» ушбу воқеалар қурбони бўлган мухлисларини ҳимоя қилиб, қуйидагиларни таъкидламоқчи:

1. Финал учун айнан шу жой танланишига нима сабаб бўлганини ва ўша куни содир бўлган воқеаларни ҳисобга олган ҳолда қандай мезонлар инобатга олинганини билмоқчимиз.

2. «Мухлисларнинг ожиз ва ҳимоясиз қолдирилишига ким жавобгар?», деган саволга жавоб ва изоҳлар берилишини сўраб қоламиз. Улардан аксариятининг бу воқеалар давомидаги хатти-ҳаракатлари ибратли эди.

Мухлислар учун футбол байрамига айланиши керак бўлган воқеалар кўнгилсиз якун топди ва бутун дунёда чуқур ғазабга сабаб бўлди.

Кўплаб мухлислар шафқатсиз ҳужумларга, таъқибларга ва талон-тарожга учрагани ОАВ томонидан тақдим этилган суратларда яққол кўриниб турибди. Мухлислар жисмоний дахлсизлигини сақлаш ниятида автобус ёки машина ҳайдаб кетаётганда ҳам баъзи воқеалар содир бўлди. Айрим мухлислар олган жароҳатлари сабаб касалхонада тунаб қолишга мажбур бўлди.

Футбол дунёга ҳар доим интилиш лозим бўлган қадрият ва мақсадлардан йироқ бўлган тасвирни тақдим этди.

Мухлисларимиз футбол ва спортдан анча йироқ бўлган воқеаларга дуч келгани учун жавоб олишга ва вазият тушунтирилишига лойиқ", — дейилади «Реал Мадрид» тарқатган баёнотда.

Финалда «Реал» «Ливерпуль»ни енгиб (1:0), ўз тарихида 14 марта Чемпионлар Лигаси бош совринини қўлга киритди.