«Real» «Liverpul»ga qarshi bo‘lib o‘tgan Chempionlar Ligasi finalidagi tartibsizliklar borasida bayonot berdi.

«Real»—«Liverpul» o‘rtasidagi YECHL final bahsi tartibsizliklar tufayli 36 daqiqa kech boshlandi. Bir necha ming tomoshabin stadionga chiptasiz kirib ketgani, ayrim chiptasi bor muxlislar esa arena tashqarisida qolib ketgani aytildi. Fransiya hukumati «Liverpul» muxlislarini tartibsizliklar keltirib chiqarishda aybladi. Hozirda bu borada tekshiruv ishlari olib borilmoqda.

"28 may kuni «Stad de Frans» stadioni yaqinida va kiraverishda, jumladan, stadion ichida sodir bo‘lgan ko‘ngilsiz vaziyatni hisobga olib, «Real Madrid» ushbu voqealar qurboni bo‘lgan muxlislarini himoya qilib, quyidagilarni ta’kidlamoqchi:

1. Final uchun aynan shu joy tanlanishiga nima sabab bo‘lganini va o‘sha kuni sodir bo‘lgan voqealarni hisobga olgan holda qanday mezonlar inobatga olinganini bilmoqchimiz.

2. «Muxlislarning ojiz va himoyasiz qoldirilishiga kim javobgar?», degan savolga javob va izohlar berilishini so‘rab qolamiz. Ulardan aksariyatining bu voqealar davomidagi xatti-harakatlari ibratli edi.

Muxlislar uchun futbol bayramiga aylanishi kerak bo‘lgan voqealar ko‘ngilsiz yakun topdi va butun dunyoda chuqur g‘azabga sabab bo‘ldi.

Ko‘plab muxlislar shafqatsiz hujumlarga, ta’qiblarga va talon-tarojga uchragani OAV tomonidan taqdim etilgan suratlarda yaqqol ko‘rinib turibdi. Muxlislar jismoniy daxlsizligini saqlash niyatida avtobus yoki mashina haydab ketayotganda ham ba’zi voqealar sodir bo‘ldi. Ayrim muxlislar olgan jarohatlari sabab kasalxonada tunab qolishga majbur bo‘ldi.

Futbol dunyoga har doim intilish lozim bo‘lgan qadriyat va maqsadlardan yiroq bo‘lgan tasvirni taqdim etdi.

Muxlislarimiz futbol va sportdan ancha yiroq bo‘lgan voqealarga duch kelgani uchun javob olishga va vaziyat tushuntirilishiga loyiq", — deyiladi «Real Madrid» tarqatgan bayonotda.

Finalda «Real» «Liverpul»ni yengib (1:0), o‘z tarixida 14 marta Chempionlar Ligasi bosh sovrinini qo‘lga kiritdi.