23 ёшгача бўлган футболчилар ўртасида юртимизда бўлиб ўтаётган Осиё кубогининг дастлабки чорак финал баҳси бўлиб ўтди. Австралия ва Туркманистон терма жамоалари ўртасидаги учрашув тақдирини ягона гол ҳал қилди.

Қўшниларимиз бутун ўйин давомида тартибли ўйин намойиш этишди. Натижада "кенгурулар" биринчи бўлимда Туркманистон дарвозаси олдида хавфли вазият ярата олишмади.

Туркманлар иккинчи таймни ҳам яхши ўтказишаётганди, аммо ягона хато учрашув тақдирини ҳал қилди. 74-дақиқада австралияликлар юқоридан тўпни рақиб жарима майдонига етказишди. Марказий ҳимоячи Ўразов тўпни бош билан қайтармоқчи бўлди, аммо у ўз дарвозаси томон зарбага айланиб кетди. Тўп дарвозабоннинг қўли аралаш тўсин орқали чизиқни кесиб ўтди.

Яшил қитъа вакиллари сўнгги дақиқаларда яхши ҳимояланиб, ўйинни назорат қилишди ва ғалабани сақлаб қолишди. Австралия Осиё чемпионатининг илк ярим финалчисига айланди.

U23 Осиё кубоги, чорак финал
АВСТРАЛИЯ - ТУРКМАНИСТОН - 1:0 (0:0)
Гол: Ўразов (74-автогол)