Ўзбекистон терма жамоаси чорак финалда Эронга дуч келиб қолмаслиги учун Индонезияни йирик ҳисобда мағлуб этиши шарт эди (агар Кувайт Хитойни мағлубиятга учратадиган бўлса). Кутилмаганда, Кувайт Хитойни 5:0 ҳисобида тор-мор этди ва бизнинг ўта йирик ҳисобдаги ғалабамиз ҳам гуруҳда 1-ўринни эгаллаш имконини бермади.
Ўйин стенограммаси билан танишинг:
3-дақиқа. Дилшод Ирсалиев дарвоза томон кучли зарба берди. Дарвозабон олдида унга тескари тарзда турган Фарҳод Абдумавлонов тўп йўналишини бироз ўзгартира олди ва тўп дарвоза тўридан жой олди — 1:0.
7-дақиқа. Бўлим ўрталарига етиб келмасидан индонезияликлар 5та фол ишлатиб бўлишди.
8-дақиқа. Бурчакдан етказиб берилган тўпни Нодир Элибоев ерлатиб тепди ва тўп дарвоза бурчагига бориб тушди — 2:0.
13-дақиқа. Ён чизиқдан тўп ўйинга киритилган вазиятда ҳамюртларимиз 7-рақамли Густиан Варданани кўздан қочиришди ва у дарвозамизнинг бўш қолган қисмига тўпни йўллади — 2:1.
13-дақиқа. Дилшод Ирсалиев кейинги ҳужумдаёқ ҳисобни 3:1га етказди. Бурчак зарбаси амалга оширилганидан кейин тўп юқори кўтарилди ва уни Дилшод Ирсалиев бош билан дарвозага йўллаб қўйди.
16-дақиқа. Терма жамоамиз томонидан уюштирилган чиройли комбинацияни Хуршид Тожибоев самарали якунлади — 4:1.
20-дақиқа. Индонезия терма жамоаси дастлабки 7 дақиқа давомида 5та фолга йўл қўйиб бўлган бўлсалар-да, қолган 13 дақиқа давомида бирорта ҳам қоида бузишмади. Танаффусга жамоалар 4:1 ҳисобида чиқиб кетишди. Кеча бўлиб ўтган Кувайт ва Индонезия ўртасидаги баҳснинг биринчи бўлимидан кейин ҳам шундай ҳисоб қайд этилганди.
21-дақиқа. Фарҳод Абдумавлонов уч нафар рақиб футзалчиси қуршовида туришига қарамай, дарвозани ишғол қила олди — 5:1.
25-дақиқа. Ўнг қано чизиғига яқинида Олег Холмуҳаммедов тўпни Хуршид Тожибоев узатди ва қайта қабул қилиб, кучли зарба билан дарвозани ишғол қилди — 6:1.
28-дақиқа. Индонезиянинг икки нафар ўйинчиси қарши ҳужум оқибатида дарвозабонимиз билан иккига бир вазиятга чиқиб келишди ва вазиятдан фойдалана олишмади. Тўпни дарвоза яқинига олиб келган футболчи зарбани ноаниқ берди.
31-дақиқа. Холматов-Раҳматов-Тожибоев комбинациясидан Хуршид жарима майдончаси ичида туриб дарвозани ишғол қилди — 7:1.
37-дақиқа. Ўзбекистон тезкор қарши ҳужум уюштиришга муваффақ бўлди ва Фарҳод Абдумавлонов дарвозабон билан бирга-бир вазиятда уни доғда қолдирди — 8:1.
40-дақиқа. Индонезия иккинчи бўлимдаги олтинчи фолга йўл қўйди. Натижада дабл-пенальти белгиланди. 10 метрлик жарима зарбасини эса Свиридов амалга оширди. Константиннинг зарбасини дарвозабон қайтарган бўлсада, Дилшод Раҳматов югуриб келиб тўпни дарвозага йўллади — 9:1.
Ҳисоб ана шундай ҳисоб билан тугади, аммо гуруҳда бирибир иккинчи ўринни эгалладик. Кувайт терма жамоаси бош мураббийи таъкидлаганидек, кувайтликлар мусобақа сенсацисиясини юзага келтиришди. Улар Хитойни 5:0 ҳисобида ютишди ва гуруҳ ғолибига айланишди.
ОСИЁ ЧЕМПИОНАТИ
«D» ГУРУҲИ, 3-ТУР
ЎЗБЕКИСТОН – ИНДОНЕЗИЯ – 9:1 (4:1)
Голлар: Фарҳод Абдумавлонов (3, 21, 37), Нодир Элибоев (8), Дилшод Ирсалиев (13), Хуршид Тожибоев (16, 31) — Густиан Вардана (13)
Огоҳлантиришлар: Рустам Умаров (3) — Афиф Тамимий (33), Шаҳидан (39), Нур Али (40)
Ўзбекистон: 1.Рустам Умаров (д), 2.Дилшод Ирсалиев, 3.Нодир Элибоев, 4.Шуҳрат Тожибоев (с), 8.Фарҳод Абдумавлонов.
Захирадагилар: 16.Олег Тукмаков (д), 5.Мақсуд Файзуллаев, 6.Олег Холмуҳаммедов, 7.Хуршид Тожибоев, 9.Дилшод Раҳматов, 14.Константин Свиридов, 15.Умид Холматов.
Индонезия: 1.Аде Лесмана (д), 5.Шаҳидан, 7.Густиан Вардана, 4.Денни Хандойо (с), 12.Афиф Тамимий.
Захирадагилар: 2.Тегу Сарендра (д), 13.Агус Салам (д); 3.Нур Али, 6.Таупик, 8.Фужи, 16.Карамий, 19.Жулинур Хафид.
Ҳакамлар: Алиреза Балсини (Эрон), Воҳид Муҳамара (Эрон), Ҳусайн Халайла (Иордания).
Комиссар: Абдул Гаруф Ҳамид (Мальдив ороллари)
ХИТОЙ - КУВАЙТ - 0:5
