Тожикистон Республикаси Душанбе шаҳрига учиб кетган Жиззахнинг “Сўғдиёна” профессионал футбол клуби (ПФК) “Rumi Hotеl Dushanbе” меҳмонхонасига жойлашди.
Улуғбек Бақоев бош мураббийлигидаги “Сўғдиёна” футбол жамоаси қўшни республикада ўтадиган “ОФК кубоги-2022” гуруҳ босқичида Ўзбекистон шарафини ҳимоя қилади. Жиззахликлар “Е” гуруҳида плей-офф босқичига бериладиган ягона йўлланма учун баҳс олиб боради.
“Сўғдиёна” футболчилари кечанинг ўзида мусобақалар ўтадиган Душанбе шаҳридаги сунъий қопламали майдонда илк машғулотини ўтказди.
Эслатиб ўтамиз, “Сўғдиёна” гуруҳдаги илк баҳсни 24 июнь куни соат 19:00 да Қирғизистон Республикасининг “Нефтчи” клубига қарши ўтказади.
Орадан 3 кун ўтиб, яъни 27 июнь куни соат 22:00 да Тожикистоннинг ЦСКАсига қарши майдонга чиқса, яна 3 кундан кейин – 30 июнь куни Туркманистоннинг “Алтин асир” жамоаси билан учрашади.
