Ҳиндистон аёллар терма жамоаси аъзоси Дангмей Грейс "Насаф" клуби қошидаги "Севинч" жамоаси билан шартнома имзолади. Бу ҳақда ҳинд нашрлари хабар тарқатди. Манбага кўра, келишув 6 ойга мўлжалланган.

26 ёшли футболчи сўнгги 2 йилни "Гокулам Керала" клубида ўтказди. У 2013 йилдан буён Ҳиндистон миллий жамоаси аъзоси ҳисобланади.

"Ҳар бир ўйинчида бўлганидек менда ҳам хориж клубида тўп тепиш орзуси бор эди. Ушбу мақсадим амалга ошадиган бўлди. Мен жуда ҳам ҳаяжондаман. Мен ҳали "Севинч" бош мураббийи билан гаплашмадим. Аммо бу жамоанинг ўйин услуби "Гокулам Керала"дан фарқ қилса керак деб ўйлайман. Жамоага мослашиб олиш менинг дастлабки мақсадим ҳисобланади", — деди Дангмей.

Дангмей Грейс 2019 йилда Ҳиндистоннинг энг яхши футболчиси деб топилган.

Маълумот ўрнида. "Севинч" Ўзбекистон чемпионатининг жорий мавсумида 11-турдан кейин 29 очко билан пешқадамлик қилмоқда. "Сўғдиёна" ҳисобида ҳам шунча очко мавжуд. "Бунёдкор" эса улардан бир очко кам жамғарган.