«Арсенал» ярим ҳимоячиси Томас Парти жинсий зўравонлик можаросига аралашиб қолди, дея хабар беради Pulse Nigeria.

Исми ошкор этилишини хоҳламаган қиз ижтимоий тармоқларнинг бирида Парти билан ёзишмаларини эълон қилиб, у билан боғлиқ вазият ҳақида гапирди:

«Томас Парти — серияли зўравон, унинг омади келган. Чунки Буюк Британия қонунчилигида маҳаллий полиция кучларига Буюк Британиядан ташқарида содир этилган жиноятларни тергов қилишига рухсат берувчи ўзгартиришлар киритилишидан 10 кун олдин у мени зўрлаган эди.

У мени зўрлаб, ётоқда ҳушсиз ҳолда қолдирди, кейин Ибицадаги зиёфатга кетди. Қайтгач эса юзимга қараб кулди ва уни рад эта олмаслигимни айтди».

Шу билан бирга жабрланувчи илгари «Арсенал» футболчиси билан муносабатда бўлганини тасдиқлаб, у юборган видеохабарларни кўрсатган. Қиз воқеа бир неча ой олдин содир бўлгани ва у бошидан кечирганларини ошкор қилмагани учун пул олганини таъкидлаган.

Ўз навбатида, у адолат қарор топишига ишонишини билдирган. Футболчи эса ўзига қўйилаётган айбловларга муносабат билдирмаяпти.

Аввалроқ Партининг турмуш ўртоғи, марокашлик модель Сара Белла ҳам уни зўравонликда айблаган эди. ОАВ хабарларига кўра, бунга Томас турмуш қуриш таклифини бермагани сабаб бўлган.