"Бавария" ҳимоячиси Бенжамин Павард "Челси" қизиқиш билдираётганига қарамай, Мюнхен клубида қолишга қарор қилди, дея хабар бермоқда журналист Лоик Танзи.
26 ёшли франциялик футболчи 2019 йилнинг ёзидан бери немис гигантининг шарафини ҳимоя қилиб келмоқда. Умуман олганда, футболчи "Бавария" таркибида 120 та ўйин ўтказиб, 6 та гол урган ва 11 та голли узатмани амалга оширган. Илгари у "Штутгарт" ва "Лилль" жамоалари ҳам тўп сурган.
Паварднинг Германия чемпиони билан амалдаги шартномаси 2024 йилнинг ёзига қадар тузилган. Transfermarkt портали Франция терма жамоаси футболчисини 30 миллион еврога баҳоламоқда.
