"Барселона" раҳбарияти ярим ҳимоячи Дани Ольмо билан тузилган битим шартларини қайта кўриб чиқишга тайёрланмоқда. Унга кўра, жорий ёзги трансферлар ойнасида футболчининг маоши сезиларли даражада оширилади. Бу орқали Каталония клуби раҳбарияти ўз вақтида ўйинчи олдида олган мажбуриятини бажаради.
Клуб мутасаддилари Ольмонинг 2024 йил ёзида жамоага келиб қўшилиш жараёнида кўрсатган жонбозлигини юксак қадрлайди. Ўшанда испаниялик футболчи бошқа жамоалардан тушган анча манфаатли молиявий таклифларни рад этганди. У "кўк-анорранглилар"даги молиявий фэйр-плей чекловлари ва рўйхатдан ўтказиш билан боғлиқ муаммоларни юмшатиш мақсадида маоши камайтирилишига ҳам кўнган эди.
Шу сабабли, томонлар ҳамкорликнинг дастлабки босқичидаёқ шартноманинг учинчи йилидан бошлаб маош миқдорини кўтариш борасида келишувга эришган. Бу чора дастлабки икки мавсум давомида юзага келган моддий йўқотишлар учун ўзига хос қоплама (компенсация) вазифасини ўтайди.
Ҳозирги вақтда Ольмо бор эътиборини фақат "Барселона"даги фаолиятига қаратган ва клуб билан 2030 йилга қадар мўлжалланган шартномани охиригача етказишни мақсад қилган. Таъкидлаш жоизки, 2025 йил январида рўйхатдан ўтиш масаласида чалкашликлар пайтида у жамоани эркин агент сифатида тарк этиши, бунинг эвазига бошқа клубдан катта миқдорда бонус ва юқори маош олиши мумкин эди. Бироқ Дани Жоан Лапорта ҳамда Декунинг сўзларига ишониб, Каталонияда қолишга қарор қилди.
Қайд этиш жоизки, ярим ҳимоячи Саудия Арабистонидан бўлган ўта йирик молиявий чорловга рад жавобини берган. Шунингдек, Лондоннинг "Арсенал" каби топ-клублари қизиқиши ҳақидаги хабарларни ҳам инобатга олмаган.
Футболчининг ўзи "Барселона"ни ўз карьераси учун энг маъқул маскан деб билади. У ўзи улғайган ва болалигидан орзу қилган жамоада тўп тепмоқда, оиласи ҳамда яқинлари даврасида яшамоқда. Энг муҳими, у Ханси Флик бошчилигидаги лойиҳага тўлиқ ишонади.
