22 ёшида “Барселона”дан МЛСга кетиш ҳақида ҳикоя.
Рики Пуч: амалга ўзини кўрсата олмаган истеъдодми ёки вазиятлар қурбони? Бу, биринчи навбатда, футболчига катта умид боғланганлиги билан боғлиқ. Пуч 14 ёшида Каталония клуби тизимида эди. Ўшандан бери у “кўк-анорранглилар” академиясининг турли ёш гуруҳларида аъло даражада ўйнади. Ёш ярим ҳимоячининг ёши улғайган сари уни Андрес Иниеста ва Хави билан солиштиришарди.
Пуч "Барселона Б" (каталонияликларнинг иккинчи жамоаси) таркибида 56 та ўйин ўтказиб, 2 та гол урди ва 10 та голли узатмани амалга оширди. Бу марказий ярим ҳимоячи учун яхши кўрсаткичлар. Рики 2018 йил 5 декабрь куни Эрнесто Вальверде қўл остида асосий жамоада дебют қилган. Бу Испания кубоги доирасида "Културал Леонес"га қарши ўйин бўлиб, унда ёш ярим ҳимоячи голли узатмани амалга оширганди.
Пуч Ла Лигадаги дебютини 2019 йил 13 апрель куни “Уэска”га қарши ўтказди. Ўшандан бери футболчини яқиндан кузатиб боришди, чунки у академияда яхши натижалар кўрсатди. Бироқ Вальверде ёш ярим ҳимоячига кўп имкониятлар бермади, гарчи айнан у Рикига асосий таркибда дебютини ўтказишига имкон берган бўлса-да.
Пуч учун ҳақиқий муаммолар Рональд Куман бош мураббий этиб тайинланганидан кейин бошланди. Унинг қўл остида Рики ҳар бир учрашувда ўртача 20 дақиқани майдонда ўтказди. Бу унинг каталонияликлар учун асосий таркибга ўтганидан бери энг ёмон ўйин вақтлари эди. Умуман олганда, 2020/21 йилги мавсумда ярим ҳимоячи Ла Лигада 281 дақиқа, Чемпионлар лигасида 86 дақиқа ва Испания кубогида 162 дақиқа ўйнади. Куман футболчининг ижарага берилишини таъкидлади. Қолаверса, "Фулхэм", "Бенфика" ва "Фиорентина" билан яхши вариантлар бор эди.
Пуч ижарага кетишдан бош тортди. Рики биринчи навбатда "Барселона"га мос келадиган ўзига хос ўйин услубига эга эканлигини айтди. Куман кетганидан сўнг, футболчи учун қийин давр тугаши керак эди. Негаки, нидерландиялик мураббий ўрнига Пучнинг ашаддий мухлиси Хави Эрнандес келди. Мутахассис ҳали “Ас-Садд” устози бўлганидаёқ ярим ҳимоячини ўзи ижарага олмоқчи эди. Бироқ футболчи Қатардаги кумири жамоасига бормади. У Каталония клубида ўз имкониятини кутишда давом этди.
Хавининг келиши Пучга далда берди. У ҳатто агентини ўзгартирди ва ҳозирги мураббий манфаатларини ифодаловчи одамни ишга олди. Бироқ футболчининг аҳволи унчалик яхшиланмади. Аввалига Рики Хави қўл остида ўйнади, аммо вақт ўтиши билан у яна тез-тез "Барселона" ўйинларини захира ўриндиғида кузата бошлади.
Хави Рики бошқа ярим ҳимоячиларга рақобатни бой бераётганини очиқ айтди. Мутахассис учун у Гави, Педри, Нико Гонсалес ва Френки де Йонгдан кейин бешинчи вариант эди.
Рики клубга содиқлиги туфайли "Барселона"ни тарк этишни истамаслигини бир неча бор таъкидлаган. Аммо у бу гапларида самимий эдими? Мухлислар шубҳалана бошладилар. Аввалига футболчини Жерард Пике билан тунги клубларда юрган расмлар тарқалди. Кейинчалик Интернетда бир интервью пайдо бўлди, унда Пуч каталонияликларни бир неча марта тарк этиши мумкинлигини тан олди. Маълум бўлишича, гап футболчининг содиқлигида билан боғлиқ эмас. Рики шунчаки ўзининг комфорт зонасини тарк этишни хоҳламади, гарчи “Милан” ва “Челси” уни сотиб олишга тайёр эди.
Пуч охир-оқибат “Барселона”ни тарк этди. Август ойи бошида унинг “Лос-Анжелес Гелак”сига ўтаётгани маълум бўлди. Томонлар 3 йиллик шартнома имзолашди. Каталонияликлар футболчини текинга қўйиб юборишди, гарчи унинг шартномаси тугашига ҳали 1 йил қолганди. Бунинг эвазига клуб ўйинчини қайтариб сотиб олиш ҳуқуқини ёки унинг кейинги қайта сотилган суммасининг 50 фоизини олади. Янгилик бироз ҳайратда қолдирди. 22 ёшида “Барселона”дан МЛСга кетган футболчини эслай олмайман.
“Барселона"да муваффақият қозона олмаганига қарамай, Пучга Европанинг жиддий клубларидан таклифлар бор эди. Энди унинг трансферига ҳатто АҚШда ҳам шубҳа билан қаралмоқда, у ерга асосан футболчилар фаолиятининг якунида кетишарди. Рикки, масалан, Лоренсо Инсинье ёки Гарет Бэйл каби катта номга эга эмас. Испаниялик ҳеч нарсага эриша олмади ва кўрсатмади. Қаердадир вазият унга халақит берди, лекин кўп нарса футболчининг ўзига боғлиқ эди. МЛСда Пуч ҳаммасини бошидан бошлаши керак ва бу воқеа ҳикоя қандай тугаши “Барселона” мухлисларини бефарқ қолдирмаслиги керак, назаримда.
