Бугун Тошкентнинг "Пахтакор" жамоаси мураббийлар штабида ўзгариш рўй берди.

Миллий чемпионат ва Осиё Чемпионлар лигасидаги қониқарсиз натижалар сабабли жамоа бош мураббийи вазифасини бажариб келган Деян Журжевич билан клуб ўртасида тузилган шартнома икки томон келишувига кўра бекор қилинди. Унга ёрдамчи сифатида ишлаб келган Дражен Дукич ҳам Журжевич билан бирга шартномасини бекор қилдирди. Эслатиб ўтамиз, жамоамиз ОЧЛни тарк этгач, олий лигада ижобий натижаларга эришиб келаётганди.  Бироқ охирги икки турдаги мағлубиятлар "Пахтакор"ни учинчи ўринга тушириб қўйди.

Бош мураббий вазифасини бажариш ваколати шу пайтгача ёшлар жамоасига устозлик қилиб келган Мурод Исмоиловга вақтинчалик ишониб топширилди. У ўтган мавсум охирида ҳам шу ишни бажарган ва Ўзбекистон Кубогини қўлга киритишга ҳисса қўшганди. Биз Журжевич ва Дукичга жамоа учун қилган меҳнатларига миннатдорчилик билдириб, уларнинг келгусилаги фаолиятига омад тилаймиз. Умид қиламизки, Мурод Исмоиловнинг асосий жамоага қайтиши яна бир бор омадли чиқади.