Олий лиганинг биринчи давра учрашувлари якунланишига бир тур қолган бўлса-да, оралиқ марра ғолиби маълум. “Бунёдкор” турнир жадвалида танҳо пешқадамлик қилмоқда. Иккинчи поғонада бораётган Қаршининг “Насаф” клуби 12 учрашувда 22 очко жамғарган бўлса, тошкентлик “шерлар” ўз жамғармаларига 21 очко йиғишди.

Агар билсангиз, бизнинг миллий чемпионатларимиз тарихида бир эски анъана мавжуд. Ким биринчи даврани ютса, у йил охирида албатта олтин медалларга сазовор бўлади. Мазкур одим ортда қолган 20та чемпионатдан фақат иккитасида бузилган холос. Фарғонанинг “Нефтчи” клуби 2003 йили, Қаршининг “Насаф” жамоаси эса 2005 йили биринчиликнинг дастлабки ярмидан кейинги устунликларини сақлаб қола олишмаган. Чемпионат экваторида тўққиз йил олдин “Нефтчи”дан, етти йил аввал эса “Насаф”дан бир очко кам тўплаб, ўша маҳал 2-ўринда турган “Пахтакор”, иккала сафар ҳам мавсум охирида барибир шоҳсупанинг энг юқори поғонасига кўтарилишга муваффақ бўлган.

Иккинчи даврада биринчисидагидан пастроқ кўрсаткич қайд этиб ҳам якунда олтин медалларни қўлга киритиш ҳолати кўп бора кузатилган. 1994, 1996, 1997, 1999, 2001, 2002, 2004, 2006, 2008, 2009, 2010 ва 2011 йилги мавсумларда биринчи давра ғолиблигини кўлга киритган жамоа чемпионатнинг иккинчи қисмини бироз сустроқ ўтказса-да, ўз пешқадамлигини сақлай олган.

Фақатгина икки бор биринчи давра ғолиблари юз фоизли натижани қайд этишган. 1997 йили МҲСК ва 2009 йили “Бунёдкор” аъзоларигина биринчи давранинг барча учрашувларида ғалаба нашидасини суришган.

Ўзбекистонда 1-давра ғолиблари якунда чемпионликни қўлга киритишлари анъанаси