Тошкентнинг «Ардус» клуби вакили Артур Юнусов жароҳатдан тўла фориғ бўлди. Бу ҳолат хаттоки Осиё футбол конфедерацияси расмий веб-сайтини ҳам бефарқ қолдирмади.

Юнусов ҳақида хабар тайёрлаган ОФК веб-сайти, унинг «Ал-Райян»га қарши ярим финал ўйинида майдонга тушишини таҳмин қилмоқда. «Шу йилнинг май ойида Дубай мезбонлик қилган Осиё чемпионатини ўтказиб юборган Артур Юнусов жароҳатидан тўла фориғ бўлди», - деб ёзади ОФК сайти.

2008 ва 2010 йилги Осиё чемпионатининг энг яхши ўйинчиларидан бири бўлган Артур Юнусов, тўпурарлик қобилятини ҳам намойиш қилганди, деб ёзилади хабарда. Ўзбекистон чемпионатида 45та гол билан тўпурар бўлган Артур Юнусов март ойидан бери жароҳатини даволаб, секин-аста формага кирди. Бу орада «Ардус» амалдаги чемпион – Япониянинг «Нагоя Оушенс»ни мағлуб этиб, Эрон чемпионига ярим финалда рақиб бўлишдан қутулиб қолди.

«Жамоадошларинг сафига қайтиш ёқимли», дейди Артур Юнусов. «Кўпчилик ярим фипалда «Ал-Райян»нинг имкониятини нисбатан паст баҳолаётгани тўғри эмас. Улар бизга қарши мағлуб бўлиш учун майдонга тушишмайди. Биз рақибларимизни хурмат қилишимиз лозим. Боиси улар ўзларини ҳар томонлама яхши тарафдан намойиш қила олишди. Бу каби турнирнинг ярим финалига қадар етиб келиш таҳсинга сазовор», - дейди Юнусов.

Қитъанинг кўзга кўринган футболчиларидан бири «Ардус» сафига қайтган бўлсада, Александр Петров бошқа муаммога дуч келди. Таиланд чемпиони «Банк Рбак»га қарши ўйинда жамоанинг етакчи футболчиларидан бири Дилшод Раҳматов жароҳат олди. Унинг ярим финал ва ундан кейинги ўйинда майдонга тушиши катта сўроқ остида. Ўз навбатида «Ал-Райян» ҳақида ОФК сайти «Ардус» бош мураббийи Александр Петровнинг ҳам фикрини келтириб ўтган:

«Биз саралашда «Ал-Райян» устидан 9:1 ҳисобида ғалаба қозонгандик. Лекин ҳозир мен жамоа сафида бир қатор янги футболчиларни кўрмоқдаман. Бу сафарги ўйин бутунлай бошқача бўлади».