"ПСЖ" дарвозабони Кейлор Навас қишки трансфер ойнасида клубини ўзгартириши мумкин. 35 ёшли дарвозабон фаолиятини Англия Премьер-лигасида давом эттиришни режалаштирмоқда, деб хабар беради Foot Mercato.
Тажрибали дарвозабон ҳозирда Лондоннинг “Вест Хэм” ва “Тоттенхэм” клублари ҳамда “Манчестер Юнайтед” эътиборида бўлиб турибди.
Кейлор Навас "ПСЖ"нинг асосий таркибидаги ўрнини йўқотди ва бу мавсумда жамоа сафида бирорта ҳам ўйин ўтказмади. Жамоа бош мураббийи Кристоф Галтье италиялик Жанлуижи Доннаруммани афзал кўради.
Навас 2019 йил сентябридан буён Франциянинг “ПСЖ” клубида ўйнамоқда. Унинг парижликлар билан шартномаси 2023/2024 йилги мавсум охиригача амал қилади.