Мадриднинг «Реал» клуби президентлигига номзод Энрике Рикельме аллақачон келишувга эришилган иккита йирик трансфер ҳақида яна бир бор гапириб ўтди. Флорентино Переснинг рақиби ҳозирча футболчиларнинг исмларини ошкор қилмаяпти, аммо ишоралар беришда давом этмоқда.

«Шуни айта оламанки, биз жаҳон даражасидаги иккита юлдуз футболчини имзолаймиз. Испания терма жамоасида менинг севимли клубимдан бирорта ҳам футболчи йўқлигини кўриш менга жуда оғриқли. Агар мен «Реал» президенти бўлсам, жамоамизга шу жаҳон чемпионатида иштирок этадиган испаниялик футболчи келади», – дея Рикельменинг сўзларини келтиради Madrid Zone.

Аввалроқ, 37 ёшли бизнесмен «Манчестер Сити» ярим ҳимоячиси Родрини назарда тутаётгани тахмин қилинган эди. «Реал» президентлиги учун сайловлар 7 июнь куни бўлиб ўтади.