8 июл куни Ўзбекистон Кубоги ¼ финалининг дастлабки учрашувида ўз майдонида «Пахтакор»га 1:2 ҳисобида ютқазиб қўйгандан сўнг Александр Аверьянов шогирдларига кичик таътил берди. Жамоа аъзолари 16 июл куни яна ўз қароргоҳида тўпланадилар.

 Айни пайтда бош мураббий ҳам уйга кетган ва тез орада Андижонга қайтиб келади. Хабарингиз бор, «Бургутлар» биринчи даврани муваффақиятли ўтказа олмади. Шунинг учун иккинчи давра арафасида таркибда бир қатор ислоҳотлар амалга оширилиши устивор вазифалардан бирига айланди.

Ҳозирги келиб клуб айрим футболчиларнинг хизматидан воз кечди. Жумладан мавсум бошида катта умидлар билан таклиф этилган белоруссиялик дарвозабон Александр Петухов ўз юртига қайтиб кетди. 28 ёшли дарвозабон биринчи давра мобайнида «Андижон» таркибида 450 дақиқани майдонда ўтказди. Бу эса бешта учрашувда иштирок этди деганидир. Аммо у ўзидан илиқ таассурот қолдирмади. Боз устига олган жароҳати ҳам унга салбий таъсир кўрсатди.

Украиналик ҳимоячи Олександр Половков ҳам жамоа билан хайрлашди. 2010 йилнинг иккинчи ярмидан бери андижонликлар шарафини ҳимоя қилиб келган ўйинчи бу йил жароҳатлар исканжасига тушиб қолди. Шу боис у бор йўғи 4-турда «Динамо»га қарши (0:3) учрашувда майдонда тўлиқ тўп сурди. Ушбу ўйин Половковнинг бу йилги чемпионатдаги биринчи ва охирги ўйини бўлиб қолди.

Булардан ташқари Санжар Тўрақулов, Акром Баҳритдинов, Анвар Раҳимов каби футболчилар ҳам жамоа билан хайрлашдилар.

Энди иккинчи давра учун тайёргарлик режаси хусусида тўхталадиган бўлсак, 16 июлдан бошланадиган машғулотлар асосан Андижон шаҳрида олиб борилади. 29 июл куни Ўзбекистон Кубогининг чорак финал жавоб ўйинида «Пахтакор»га қарши майдонга тушадилар. Ушбу беллашувга қадар жамоа пухта тайёргарлик кўришни ўз олдига мақсад қилиб қўйган. Табиийки, айни пайтда юртимизда трансфер ойнаси очилган. Шу муносабат билан иккинчи давра учун таркиб янада кучайтирилиши режалаштирилган. Ҳозирда бу борада музокаралар давом этмоқда. Йиғин давомида эса янги ўйинчилар таркибга қўшиладилар.