Ўзбекистонлик ФИФА агенти Санъат Шарипов ўз Твиттери орқали маълум қилишича, Саудиянинг "Аш-Шабоб" клуби ҳамюртимиз Сервер Жепаровни трансферга қўймоқчи экан.

"Саудиялик ишончли манбаларга кўра, "Аш-Шабоб" клуби шайхи Сервер Жепаровни сотиб юбормоқчи. Клуб раҳбарияти унинг ўтган йилги ўйинидан қониқмаган. Афтидан шайх Серверни шошма-шошарлик билан сотиб олган кўринади. Энди у учун энг катта бош оғриқ — Серверга сарфланган каттагина маблағни қайтариб олиш. Ҳаттоки Қатар клублари ҳам ўйинчини сотиб олишолмаяпти", дея ёзади С.Шарипов.

"Ҳозирча форс кўрфазида ўзини яққол кўрсатган футболчи Азизбек Ҳайдаров бўлиб турибди. Ўйинчиларимизга бўлган талаб сўниб бормоқда. Футболчиларимиз ўз устида ишламаса, ўзбекистонлик футболчилар ташқарига чиқа олмайди. Улар ўз устиларида кўпроқ ишлаши лозим. Жисмоний тайёргарликка алоҳида эътибор бериш керак. Бунинг устида фақатгина қишда ишлаш керакмас. Кўзи ёнадиган ўйинчилар чиқармикан биздан", дея хавотир билан ёзади Санъат Шарипов.

"Айримлар мендан "Фалон футболчини Россия клубларига тавсия қилмадингизми?", деб сўрашади. Наҳотки содда бўлмаса бизнинг мухлислар дейман. Россия футбол қандай ривожланганию, унда кимлар ўйнаётганини наҳотки кўришмаса? Одил бу мустасно. Унда Аллоҳ берган иқтидор бор. Қолганлар эса ўз устида фақатгина ишлаши керак. Машғулотда бекорга вақт ўтказгани билан иш битмайди. Шунча тавсия қилганимиздан кейин бирортаси билан қизиқишгани йўқ. Хўш, унда Ўзбекистонда ўйнайвергани яхшими ёки араб давлатларига бориб, пул ишлагани ва тажриба орттиргани?", дея ўз Твиттерида жон куйдиради ФИФА агенти.