ФИФАнинг собиқ президенти Йозеф Блаттер 2022 йилги жаҳон чемпионати АҚШда ўтказилиши керак эди, бироқ УЕФА раҳбари Мишель Платини Франция президенти илтимосига кўра Қатарга овоз берганини айтди. Кейинроқ Қатар Франциядан бир неча ўн миллиард долларга қирувчи самолётлар сотиб олгани маълум бўлди.
"Қатар жуда кичик давлат. Футбол ва Жаҳон чемпионати бу давлат учун жуда катта. Қатарни танлаш хато эди. Ижроия қўмитасида 2018 йилда Россия, 2022 йилда эса АҚШ Жаҳон чемпионатига мезбонлик қилиши ҳақида келишиб олдик. Икки узоқ йиллик сиёсий рақиблар навбатма-навбат Жаҳон чемпионатини ташкил қилишса, бу тинчлик ишораси бўларди.
Бироқ ФИФАнинг ҳал қилувчи конгрессига бир ҳафта қолганида Платини менга қўнғироқ қилиб, режамиз амалга ошмаслигини айтди. Мишель бир кун аввал Қатар шаҳзодаси билан тушлик қилган президент Саркози саройига таклиф қилинган. Саркози Платинидан: “Жаҳон чемпионати мезбони танланганда Қатар учун нимадир қилишга ҳаракат қилинг”, деб сўраган.
Платини мендан мамлакат президенти бирор нарса сўраса нима қилишимни сўради. Лекин мен бу ҳақда ҳеч ўйламаганман, чунки Швейцарияда президент йўқ, деб жавоб бердим. Умуман олганда, айнан шундай бўлди: Платинининг овозлари эвазига жаҳон чемпионати АҚШга эмас, Қатарга ўтди. Албатта, гап пулга ҳам тегишли эди. Олти ойдан сўнг Қатар Франциядан 14,6 миллиард долларга қирувчи самолётлар сотиб олди”, — дея Блаттер сўзларидан иқтибос келтирган Voetbal International нашри.
