Испания терма жамоаси Қатарда бўлиб ўтаётган жаҳон чемпионати гуруҳ босқичининг 1-тур учрашувида Коста-Рика терма жамоасини 7:0 ҳисобида мағлуб этди.

Испания жаҳон чемпионатларидаги энг йирик ғалабасини қўлга киритди.

Охирги марта бундай йирик ҳисобдаги ғалаба 2010 йилги жаҳон чемпионатида қайд этилган, ўшанда Португалия Шимолий Кореяни 7:0 ҳисобида мағлуб этганди.

Испания ва Коста-Рика Германия ва Япония билан бирга E гуруҳидан жой олган. Бу жамоалар ўртасидаги ўйин чоршанба куни эртароқ бўлиб ўтди ва японияликларнинг 2:1 ҳисобидаги ғалабаси билан якунланди.

Кейинги турда испанлар Германия терма жамоаси билан, коста-рикаликлар японияликлар билан тўқнаш келишади, учрашувлар 27 ноябрь куни бўлиб ўтади.