Дания терма жамоаси ярим ҳимоячиси Томас Дилейни жароҳати сабаб жаҳон чемпионатининг қолган қисмини ўтказиб юборади.

Футболчи гуруҳ босқичининг 1-тури доирасида Тунис билан ўйинда (0:0) жароҳат олганди. Бу ҳақда Дания терма жамоаси матбуот хизмати хабар берди.

«Биз Томасни майдонда ҳам, майдон ташқарисида ҳам соғинамиз. Қолган футболчилар тайёр, кейинги ўйинлар учун кучли таркибга эгамиз», - дейди Дания терма жамоаси бош мураббийи Каспер Юльманн.

Дания терма жамоаси Қатарда бўлиб ўтаётган жаҳон чемпионатининг «Д» гуруҳида иштирок этмоқда. Данияликларнинг рақиблари Тунис, Франция ва Австралия. 1-турдан сўнг гуруҳда французлар уч очко жамғариб, пешқадамлик қилмоқда.

Дания ва Тунисда биттадан очко бор. Австралия терма жамоаси турнир жадвалини 0 очко билан ёпиб беради.