Қатарда ўтаётган мундиал авж палласига чиқмоқда. Бугун "A" ва "B" гуруҳларида сўнги тур ўйинлари бўлиб ўтади. Ҳар бир жамоа плей-оффга чиқишни истайди ва бу учун барча имкониятларини ишга солади. Қуйида эса қайси терма жамоада кейинги босқичга чиқиш имконияти борлиги ҳақида тўхталамиз.
29 ноябрь куни ЖЧ-2022 гуруҳ босқичининг 3-туридан ўрин олган дастлабки ўйинлар бўлиб ўтади. Дастлабки икки турда тўрт очко жамғарган Нидерландия ва Англия ҳали ҳам 1/8 финалга йўлланмани кафолатлай олмаган.
"А" гуруҳи
Нидерландия: Плей-оффга чиқиш учун жамоа Қатар билан камида дуранг ўйнаши керак. Мағлубиятга учраган тақдирда, Эквадор Сенегал устидан ғалаба қозонсагина «апельсинлар» гуруҳ босқичидан чиқади, акс ҳолда голлар фарқини ҳисоблаб чиқиши керак.
Эквадор: 1/8 финалга чиқиш учун жанубий америкаликларга Сенегалга ютқазмаслик кифоя. Аммо мағлубият деярли уларнинг имкониятини нолга тенглайди, чунки улар плей-оффга чиқиши учун Қатар Нидерландияни йирик ҳисобда таслим этиши керак бўлади.
Сенегал: Африкаликлар Эквадорни мағлуб этишса, плей-оффга йўл олишади ва ютқазсалар турнирни тарк этишади. Нидерландия Қатарга ютқазсагина, дуранг Сенегални қониқтириши мумкин, аммо бу ҳолатда ҳам голлар фарқини ҳисобга олиш керак.
Қатар: турнир мезбонлари учун ҳаммаси оддий – улар Нидерландия билан сўнгги ўйинни ўтказиб, чемпионатни тарк этишади.
"B" гуруҳи
Англия: 1/8 финалга чиқиш учун Гарет Саутгейт жамоаси Уэльсга тўртта гол фарқи билан ютқазмаслиги кифоя. Агар сенсация бўлса, у ҳолда Эрон - АҚШ ўйинида дуранг қайд этилган тақдирдагина британияликлар кейинги босқичга чиқади.
Эрон: АҚШ устидан қозонилган ғалаба Осиё термасининг плей-оффга чиқишини, мағлубият эса турнирдан тушиб кетишини англатади. Агар дуранг бўлса, Уэльс Англияни ярик ҳисобда ютиб қўймаса Эрон кейинги босқичда.
АҚШ: америкаликлар учун ҳамма нарса оддий – улар Эронни мағлуб этишсагина 1/8 финалга чиқишади ва бошқа сценарийда турнирни тарк этишади.
Уэльс: Гарет Бэйл ва унинг жамоаси учун плей-оффга чиқиш жуда қийин бўлади. Асосий шарт - бу Англия устидан ғалаба қозониш. Шу билан бирга, Эрон – АҚШ ўйинида дуранг қайд этилган тақдирдагина уч тўп фарқи билан ғалаба уларни кейинги босқичга олиб чиқади. Ва фақат 4:0 ва ундан каттароқ ҳисобда ғалаба қозонган тақдирда, уэлсликларни параллель ўйин натижаси қизиқтирмайди.
