Qatarda o‘tayotgan mundial avj pallasiga chiqmoqda. Bugun "A" va "B" guruhlarida so‘ngi tur o‘yinlari bo‘lib o‘tadi. Har bir jamoa pley-offga chiqishni istaydi va bu uchun barcha imkoniyatlarini ishga soladi. Quyida esa qaysi terma jamoada keyingi bosqichga chiqish imkoniyati borligi haqida to‘xtalamiz.
29 noyabr kuni JCH-2022 guruh bosqichining 3-turidan o‘rin olgan dastlabki o‘yinlar bo‘lib o‘tadi. Dastlabki ikki turda to‘rt ochko jamg‘argan Niderlandiya va Angliya hali ham 1/8 finalga yo‘llanmani kafolatlay olmagan.
"A" guruhi
Niderlandiya: Pley-offga chiqish uchun jamoa Qatar bilan kamida durang o‘ynashi kerak. Mag‘lubiyatga uchragan taqdirda, Ekvador Senegal ustidan g‘alaba qozonsagina «apelsinlar» guruh bosqichidan chiqadi, aks holda gollar farqini hisoblab chiqishi kerak.
Ekvador: 1/8 finalga chiqish uchun janubiy amerikaliklarga Senegalga yutqazmaslik kifoya. Ammo mag‘lubiyat deyarli ularning imkoniyatini nolga tenglaydi, chunki ular pley-offga chiqishi uchun Qatar Niderlandiyani yirik hisobda taslim etishi kerak bo‘ladi.
Senegal: Afrikaliklar Ekvadorni mag‘lub etishsa, pley-offga yo‘l olishadi va yutqazsalar turnirni tark etishadi. Niderlandiya Qatarga yutqazsagina, durang Senegalni qoniqtirishi mumkin, ammo bu holatda ham gollar farqini hisobga olish kerak.
Qatar: turnir mezbonlari uchun hammasi oddiy – ular Niderlandiya bilan so‘nggi o‘yinni o‘tkazib, chempionatni tark etishadi.
"B" guruhi
Angliya: 1/8 finalga chiqish uchun Garet Sautgeyt jamoasi Uelsga to‘rtta gol farqi bilan yutqazmasligi kifoya. Agar sensasiya bo‘lsa, u holda Eron - AQSH o‘yinida durang qayd etilgan taqdirdagina britaniyaliklar keyingi bosqichga chiqadi.
Eron: AQSH ustidan qozonilgan g‘alaba Osiyo termasining pley-offga chiqishini, mag‘lubiyat esa turnirdan tushib ketishini anglatadi. Agar durang bo‘lsa, Uels Angliyani yarik hisobda yutib qo‘ymasa Eron keyingi bosqichda.
AQSH: amerikaliklar uchun hamma narsa oddiy – ular Eronni mag‘lub etishsagina 1/8 finalga chiqishadi va boshqa ssenariyda turnirni tark etishadi.
Uels: Garet Beyl va uning jamoasi uchun pley-offga chiqish juda qiyin bo‘ladi. Asosiy shart - bu Angliya ustidan g‘alaba qozonish. Shu bilan birga, Eron – AQSH o‘yinida durang qayd etilgan taqdirdagina uch to‘p farqi bilan g‘alaba ularni keyingi bosqichga olib chiqadi. Va faqat 4:0 va undan kattaroq hisobda g‘alaba qozongan taqdirda, uelsliklarni parallel o‘yin natijasi qiziqtirmaydi.
