ХХХ ёзги Олимпия ўйинлари Ўзбекистон спортчилари учун омадли бошланди. Мамлакатимиз спорт делегацияси ғазнасига Лондон Олимпиадасининг дастлабки – бронза медалини дзюдо бўйича икки карра жаҳон чемпиони Ришод Собиров келтирди.

Дзюдо беллашувларида дунёнинг бир юз ўттиздан зиёд мамлакатидан тўрт юз нафарга яқин спортчи ғолиблик учун куч синашмоқда. 60 килограмм вазн тоифасида жаҳон рейтингида етакчилик қилаётган Ришод Собиров мусобақаларни иккинчи даврадан бошлади ва рақиблари – Пекин Олимпиадаси кумуш медал совриндори, австриялик Людвиг Пайшер, венесуелалик Хавер Гуедес, бразилиялик Фелипе Китадаига қарши баҳсларда катта устунлик билан ғалаба қозонди.

Ришод ярим финал баҳсида россиялик Арсен Галстянга кичик ҳисобда имкониятни бой берган бўлса-да, бронза медали учун курашиш имконини сақлаб қолди ва франциялик Софиане Милоусни чиройли усулда енгиб, терма жамоамиз ғазнасига дастлабки медални келтирди.

Пекин Олимпиадасида бронза медални қўлга киритган 25 ёшли иқтидорли спортчимиз кейинги олимпия сиклида икки маротаба жаҳон чемпионлигига сазовор бўлган, Осиё ўйинларида олтин медални қўлга киритган, Халқаро дзюдо федерацияси мусобақалари тақвимига киритилган “Мастерс”, “Катта дубулға”, “Гран-при” мусобақаларида зафар қучган.

– Пекин Олимпиадасида бўлгани каби бу Олимпиадада ҳам Ўзбекистон спорт делагацияси ҳисобига дастлабки медални келтирганимдан хурсандман, – дейди Ришод Собиров. – Ушбу ғалабамни энг улуғ, энг азиз байрамимиз – Ватанимиз мустақиллигининг 21 йиллигига бағишлайман. Ҳар бир спортчимиз каби мен ҳам жаҳон майдонларида она Ватанимиз шарафини ҳимоя қилиш имконига истиқлол шарофати билан эришганимни чуқур ҳис қиламан. Президентимиз Ислом Каримов ва халқимиз биз, спортчиларни қўллаб-қувватлаб турганини бир дам ёдимдан чиқарганим йўқ. Бу менга кураш майдонида катта қувват берди ва ғалаба сари илҳомлантирди. Зеро, биз, ёшларни шу даражага етказган озод ва обод Ватанимиз шарафини муносиб ҳимоя қилиш ҳар биримизнинг муқаддас бурчимиздир.