"Тоттенхэм" Антонио Контега маоши оширилган янги шартнома таклиф қилади.
"Шпорлар" италиялик мутахассиснинг маошини йилига 1 миллион фунтга оширишга тайёр. Шунингдек, клуб қишки трансфер ойнасида жамоани кучайтириш учун икки нафар янги футболчини қўлга киритишга тайёрлиги хабар қилинган.
Бироқ, Конте янги шартнома имзолашга шошилмаяпти. У нафақат январда, балки ёзги трансфер ойнасида ҳам уни қўллаб-қувватлашига ишонч ҳосил қилмоқчи. Қолаверса, италиялик мутахассиснинг қарори ҳали ҳам Италияда истиқомат қилаётган оиласининг хоҳишига боғлиқ бўлади.
Антонио Конте 2021 йилнинг ноябрида "Тоттенхэм"ни бошқаришни бошлаган эди. Жорий мавсумда унинг қўл остидаги клуб Чемпионлар лигасининг плей-офф босқичига чиқди ва 15 турдан сўнг Премьер-лига турнир жадвалида 4-ўринда бормоқда.
Мураббийнинг "шпорлар" билан шартномаси жорий мавсум охиригача амал қилади ва яна 12 ойга узайтирилиши мумкин.
