Енгил атлетиканинг эркаклар ўртасида баландликка сакраш мусобақасида россиялик Иван Ухов 2.38 метрга сакраб олтин медални қўлга киритди ва Россиянинг умумжамоа ҳисобида 5-ўринга кўтарилиб олишига ҳисса қўшди.
Иккинчи ўрин 2.33 м натижа кўрсатган америкалик Эрик Кайнэрдга насиб этди. Ухов эса бундан олдин 2.36 м лик тўсиқдан ҳам эсон-омон ўтган эди ва унинг олдинги натижасини ҳам хеч ким такрорлай олмаётганди.
Энг қизиғи – бронза медал учун баҳсда кузатилди. 2.29 метрлик планка устидан бир уринишда ўтган канадалик Дэрек Друин, британиялик Роберт Грэбарц ва қатарлик Мутаз Исо Баршимлар уч уринишда 2.33 м га сакрай олишмади. Гарчи 2.29 мга Украина, АҚШ ва Канаданинг яна бир спортчилари сакрай олишган бўлсалар-да, уларда уринишлар сони кўпроқ бўлганлиги учун ушбу тўсиқдан бир уринишда ўтган спортчиларнинг ҳаммасига бронза медали тақдим этилди.
