Лионель Месси чоршанба куни кичик таътилдан сўнг "ПСЖ"га қайтди. Жамоадошлари аргентиналик ҳужумчи учун байрам уюштиришди. Месси жамоадошларининг қарсаклари остида чемпионлик йўлакчаси бўйлаб юрди. Бундан ташқари, Лео "ПСЖ"нинг маслаҳатчиси Луиш Кампуш қўлидан кичик эсдалик мукофотини олди.
Эслатиб ўтамиз, декабрь ойида Лионель Месси жаҳон чемпиони бўлганди. Қатарда бўлиб ўтган жаҳон чемпионати финалида Аргентина 3:3 ҳисобидаги дурангдан сўнг Францияни пенальтилар сериясида мағлуб этди.
"ПСЖ" навбатдаги ўйинни 6 январь, жума куни Франция кубоги 1/32 финал босқичи доирасида “Шатору” жамоасига қарши ўтказади.
