Испаниялик ФИФА рефериси Антонио Матеу Лаос бугун танқидлар остида, у яна турли мемлар учун зўр «объект» ҳам...
Гап шундаки, таниқли ҳакам ўзи ишлаган охирги 2та ўйинда футболчиларга карточка кўрсатиш бобида ҳиммати чексиз эканлигини амалда исботлади - 32та «сариқ», камига 3та «қизил»... Матеу Лаос аввалига Қатар-2022 мундиали чорак финалидан ўрин олган Нидерландия - Аргентина баҳсини сариқ рангга «бўяди» - 16та огоҳлантириш. Қарангки, у Испания Ла Лигаси 15-тури доирасидаги «Барселона» - «Эспаньол» учрашувида яна шу натижасини такрорлади - 16та сариқ карточка. Битта фарқи шуки, ЖЧ ўйинида 1та «қизил» кўрсатган ҳакам бунисида икки футболчини майдондан четлаштирди.
Эътиборлиси, Матеу Лаос «Каталония дербиси»да мезбон «Барселона» вакилларига 8та сариқ карточка кўрсатган бўлса, шундан атиги 1тасини қўполлик учун берилди. Яъни 25-дақиқада қоидага зид ҳаракатланган Ансу Фати ўйиндаги «сариқ шоу»ни бошлаб берди. Хави шогирдлари қолган вазиятларда ҳакам билан баҳслашишгани учун олишди - Жорди Альба (икки марта), Ферран Торрес, Педри, Тенас Урена, Рафинья ва Хави... Тўғри, биргина Гави бундан мустасно - у рақиб билан тўқнашувдан кейин огоҳлантирилди. «Эспаньол» вакиллари ҳам «Камп Ноу»дан «бир қоп» сариқ карточка билан қайтишди.
Диққатни тортадиган яна бир томони - Лаос жами 18та карточкадан 11тасини ўйиннинг 74-дақиқасидан кейин кўрсатди. Кўринишидан, Хави ҳақ - ҳакам чиндан ҳам, охирида ўйин назоратини қўлдан чиқариб юборди мутлақо. Шунга мувофиқ, ўйиндан кейин футбол ва жамоалар иккинчи даражага тушиб қолди ва Матеу Лаоснинг можароли ҳакамлиги бош мавзуга айланди. Умуман, «ҳимматли» реферининг иши футболчилар ва мухлисларда илк марта эътироз туғдираётгани йўқ. Дейлик, ЖЧ чорак финалидаги ўша ўйиндан сўнг ҳам ҳар икки жамоа вакиллари Лаос ишига эътироз билдиришганди.
