Ispaniyalik FIFA referisi Antonio Mateu Laos bugun tanqidlar ostida, u yana turli memlar uchun zo‘r «ob’ekt» ham...
Gap shundaki, taniqli hakam o‘zi ishlagan oxirgi 2ta o‘yinda futbolchilarga kartochka ko‘rsatish bobida himmati cheksiz ekanligini amalda isbotladi - 32ta «sariq», kamiga 3ta «qizil»... Mateu Laos avvaliga Qatar-2022 mundiali chorak finalidan o‘rin olgan Niderlandiya - Argentina bahsini sariq rangga «bo‘yadi» - 16ta ogohlantirish. Qarangki, u Ispaniya La Ligasi 15-turi doirasidagi «Barselona» - «Espanyol» uchrashuvida yana shu natijasini takrorladi - 16ta sariq kartochka. Bitta farqi shuki, JCH o‘yinida 1ta «qizil» ko‘rsatgan hakam bunisida ikki futbolchini maydondan chetlashtirdi.
E’tiborlisi, Mateu Laos «Kataloniya derbisi»da mezbon «Barselona» vakillariga 8ta sariq kartochka ko‘rsatgan bo‘lsa, shundan atigi 1tasini qo‘pollik uchun berildi. Ya’ni 25-daqiqada qoidaga zid harakatlangan Ansu Fati o‘yindagi «sariq shou»ni boshlab berdi. Xavi shogirdlari qolgan vaziyatlarda hakam bilan bahslashishgani uchun olishdi - Jordi Alba (ikki marta), Ferran Torres, Pedri, Tenas Urena, Rafinya va Xavi... To‘g‘ri, birgina Gavi bundan mustasno - u raqib bilan to‘qnashuvdan keyin ogohlantirildi. «Espanyol» vakillari ham «Kamp Nou»dan «bir qop» sariq kartochka bilan qaytishdi.
Diqqatni tortadigan yana bir tomoni - Laos jami 18ta kartochkadan 11tasini o‘yinning 74-daqiqasidan keyin ko‘rsatdi. Ko‘rinishidan, Xavi haq - hakam chindan ham, oxirida o‘yin nazoratini qo‘ldan chiqarib yubordi mutlaqo. Shunga muvofiq, o‘yindan keyin futbol va jamoalar ikkinchi darajaga tushib qoldi va Mateu Laosning mojaroli hakamligi bosh mavzuga aylandi. Umuman, «himmatli» referining ishi futbolchilar va muxlislarda ilk marta e’tiroz tug‘dirayotgani yo‘q. Deylik, JCH chorak finalidagi o‘sha o‘yindan so‘ng ham har ikki jamoa vakillari Laos ishiga e’tiroz bildirishgandi.
