Англия терма жамоаси ва "Манчестер Юнайтед" клубининг собиқ ҳимоячиси Рио Фердинанднинг фикрича, "манкунианликлар" "Тоттенхэм" ҳужумчиси Харри Кейнни қўлга киритишга ҳаракат қилишлари керак.
"Манчестер Юнайтед", Кейнга таклиф билан чиқ. "Тоттенхэм" мухлисларидан узр сўрайман, аммо клубингиз ҳеч нарса ютмайди. Харри бу жамоада совринсиз қолади. Ҳа, сиз унинг учун жиддий пул тўлашингиз керак бўлади, аммо бунинг эвазига "МЮ" доимий равишда гол урадиган футболчини олади. Кейн "Юнайтед" учун катта фойда бўларди" - деди Рио Goal.com билан суҳбатда.
29 ёшли ҳужумчи 2011 йилнинг январидан бери "Тоттенхэм"да ўйнаб келмоқда. Томонлар ўртасидаги амалдаги шартнома 2024 йилда якунига етади.
