34 ёшли ўша машҳур Нури Шахин бошқарувидаги «Анталияспор»нинг жорий мавсумдаги натижалари талаб даражасидан анча йироқ.
Ҳа, «Боруссия» Д. таркибида порлаган турк йигити бош мураббий сифатида иш бошлашга улгурди, аммо унинг жамоаси маҳаллий Суперлигада равон йўлга тушолмаяпти анчадан буён. Салбий натижалар ўз йўлига, мухлис ва мутахассислар ёш бош мураббийдан мамнунлар, барибир. Нури Шахин айниқса, ўйин бош ҳакамини жазавага тушган шогирдларидан ҳимоя қилиш асносида кўпчилик эътиборини қозонди. Sports.ru сайтининг қуйидаги мақоласи шу воқелик тафсилоти ва Шахиннинг мураббийлик йўли ҳақида.
***
Ҳакамни фақат Нури Шахин ҳимоя қилди, футболчилар ғазаб отига мингандилар, клуб эса ижтимоий тармоқлардаги саҳифаларида реферини роса калака остига олди. «Анталияспор» клуби 3 январь куни Туркия Суперлигасидан ўрин олган навбатдаги ўйинда «Фенербахче»ни қабул қилиб, 1:2 ҳисобида имкониятни бой берди. Учрашувда Миши Батшуайи томонидан қайд этилган «дубль» меҳмонларга қимматли 3 очкони тақдим этди. Учрашув давомида бош ҳакамнинг бир қатор баҳсли қарорлари Нури Шахин шогирдларини жазавага солди. Улар табиийки, реферига ошкора эътироз билдиришгача боришди. Айниқса, қўшиб берилган вақтнинг 8-дақиқасида эҳтирослар жунбушга келди: «Спартак»нинг собиқ ярим ҳимоячиси Фернандо «Фенербахче» дарвозасини ишғол қилди ва мезбонлар мағлубиятдан қочгандек бўлишди. Бироқ VAR тизими аралашувидан сўнг ҳакам голни бекор қилди - ўйиндан ташқари ҳолат ташхиси қўйилди. Оқибатда «Анталияспор» футболчилари бир зумда реферини ўраб олиб, унга кучли босим ўтказишга чоғланишди. Айни шу паллада ўртага Нури Шахин тушди ва дарғазаб шогирдларини бош ҳакам Қодир Соғлом ёнидан узоқлаштирди. Мезбонларнинг қуюшқондан чиқишгани бежиз эмас - рефери учрашув давомида уларни 4та сариқ ва 1та қизил карточка (тўғри, у Шахиннинг ёрдамчиси Альфонс Грунендейкка кўрсатилди) билан «сийлади». Эҳтимолки, Шахин вақтида майдонга тушиб, шогирдларини тинчлантирмаганида, қайсидир футболчи (ёки футболчилар) ҳам қизил карточкадан бебаҳра қолмасмиди...?
***
Учрашувдан сўнг ижтимоий тармоқларда бош ҳакамга танқидлар, бош мураббийга эса мақтовлар ёғилди, аммо можаро ҳали ниҳоясига етгани йўқ. Жумладан, «Анталияспор» матбуот хизмати «Ёвуз рицарь» сарлавҳаси остида махсус баёнот билан чиқди. Унда Қодир Соғломга «инновацион ҳакам» мақоми ёпиштирилган, рефери ва VAR тизими мутахассислари ўртасидаги мунозарали мулоқот очиқланиши талаб этилган. «Қодир Соғломни аввал ҳам билардик. У «Қосимпошо»га қарши кечган 5-тур учрашувида «Анталияспор» ҳужумчиси Ларссонга қизил карточка бермаган, лекин қаердандир зараримизга пенальти ва аут ўйлаб топганди. Охир-оқибат, рефери шу қилмиши учун 4 ҳафта муддатга футболдан четлатилди. Ўшандаёқ бизга «инновацион ҳакамлар» керак эмаслиги ҳақида бонг урганмиз...», - дейилади клуб баёнотида.
***
Нури Шахинда мураббийлик тажрибаси йўқ эмас. Ҳар ҳолда, Туркияга йўл олишига қадар Германия чемпионати Бешинчи дивизионида ишлаганди. 2015 йилнинг май ойида «Боруссия» Д. клуби ўйинида навбатдаги жиддий жароҳатга йўлиққан Шахин узоқ муддатга сафдан чиқди. Бунинг ортидан ишсиз қолган иқтидорли футболчи қадрдон клуби - «Майнерцхаген» (Дортмунддан 60 чақирим узоқликда жойлашган шаҳарча жамоаси)га ёрдам бериш илинжида акаси Уфук раҳбарлигидаги мураббийлар штабидан жой олди. Нури бу вақтда Дортмундда муолажа олар ва «Майнерцхаген» машғулотлари ёки ўйинларига ҳар ой 2-3 мартагина ташриф буюрарди. Муҳими, у клубга телефон орқали ўз кўрсатмалари билан имкон доирасида кўмаклашиб турди. Футболчи кейинчалик тикланиш жараёнини янги жамоада ўтаб, ўз устида жиддий шуғулланди. «Боруссия»да Шахин билан бирга ўйнаган дарвозабон Роман Вайденфеллер унда малакали мураббийга айланиш учун барча хусусиятлар мужассам эканлигини кўп бора таъкидлаганди: «Нури майдонда асл стратег каби фикрлар, жамоани тинмай олға етакларди. Муҳими, у Юрген Клопп, Томас Тухель ва бошқа таниқли мутахассислардан кўп нарсаларни ўрганди. Ўйлайманки, Шахин яқин орада мустақил фаолият юритадиган мураббийга айланади».
***
«Анталияспор» раҳбарияти Шахинга бирданига 5 йиллик шартнома таклиф этди. Бу турк футболида кам кузатиладиган ҳолат. Демакки, клуб президенти Азиз Чатин ёш мутахассис малакасига тўлиқ ишонади. «Ҳа, Нурига жамоани ўзи истаган даражада шакллантириши учун етарли вақт берамиз», - деганди Чатин Haber Global мухбирига берган интервьюсида. Хуллас, Шахин ўтган мавсум давомида футболчилик ролини мураббийлик билан алмаштирди ва «Анталияспор»ни 15 тур ичида аутсайдерлар сафидан еврокубоклар ҳудуди (7-ўрин)га олиб чиқди. Ҳа, жорий мавсум унинг жамоаси анча суст ўйнамоқда, ҳаттоки, мағлубиятлар серияси ҳам кузатилди. Қисқаси, Анталия клуби бу кетишда еврокубоклар йўлланмаси эмас, шунчаки, Суперлигада қолиш учун курашади, чоғи.
***
«Анталияспор» - одатий ўртамиёна, лекин иззатталаб жамоа. Клуб 2015 йили Суперлигага қайтгач, Самуэль Это~О билан шартнома тузиш учун камерунлик афсонавий ҳужумчини Италиядан олиб келишга хусусий самолёт юборганди. Кейинчалик Это~О икки мавсум жамоанинг энг яхши тўпурари бўлди. Умуман, «Анталияспор» вақтида Лукас Подольски, Самир Насри ва Милан Барош каби таниқли футболчиларни ҳам ўз таркибига жалб этган, Андреа Пирло ва Роналдиньо билан музокара олиб борганди. Тўғри, жамоа сўнгги пайтлар тежамкорликка кўпроқ эътибор қаратиб, қимматбаҳо харидларни амалга оширмаяпти ҳисоб. Асосийси, мутасаддилар ёш ва ўткир зеҳнли Нури Шахин салоҳиятига тўла ишонмоқдалар.
Қизиқарли факт шуки, «Анталияспор» таркибида бош мураббийдан катта футболчи ҳам бор - россиялик Фёдор Кудряшов 35 ёшда. Яъни у Нури Шахиндан 1 ёш катта. Фёдор яқин-яқингача бошланғич таркибнинг доимий аъзоси эди, бироқ охирги учрашувларда баъзан захирада қолиб кетмоқда.
Содиқ СОБИР тайёрлади