"Барселона" ҳужумчиси Усмон Дембеле клубда яна узоқ йиллар қолиш ниятида, деб хабар беради Diario Sport.
Манбага кўра, футболчи испан клуби билан шартномани узайтириш ниятида ва "Барселона" билан ривожланишда давом этишни мақсад қилган. Қайд этилишича, Дембеле "Барселона"даги ҳаётдан ва охирги пайтларда эришган ютуқларидан жуда мамнун. У бахтли ва яна кўп йилларини клубда ўтказмоқчи.
25 ёшли франциялик футболчи 2017 йилнинг августида "Барселона"га ўтганди. Жорий мавсумда у испан клуби сафида 27 та ўйинда майдонга тушиб, 8 та гол урди ва 7 та голли узатмани амалга оширди. Унинг шартномаси 2024 йилнинг июнида якунига етади.
