"Манчестер Сити" бош мураббийи Хосеп Гвардиола "Бавария"га ижара асосида ўтган собиқ "шаҳарликлар" ҳимоячиси Жоау Канселу билан боғлиқ вазият ҳақида гапирди.

Олдинроқ португалияликнинг трансферига испаниялик мутахассис билан зиддият сабаб бўлгани хабар қилинганди.

“Мен унга энг яхши тилакларимни тилайман. Ўзини кўрсатиш учун "Бавария"да тўрт ой бор. Келгуси мавсум нима бўлишини билмайман. У биз ғалаба қозонган Премьер-лиганинг сўнгги икки мавсумида ақл бовар қилмас эди. 2022 йилги жаҳон чемпионатидан сўнг биз бир нечта турли таркиблар билан ўйнашни бошладик ва кўрганларим менга ёқди, шунинг учун майдонда ўзини кўрсатганларга кўпроқ вақт беришга қарор қилдим. Ҳар бирининг ўзига хос хусусияти бор. Канселу ўйнашни яхши кўради, у энг яхши машқ қилади ва ҳозирги вазиятда у сўнгги бир неча ўйинларда кўп ўйнамади. У бахтли бўлиши учун ўйнаши керак ва биз ҳаммамиз унинг кетиш вақти келди деб қарор қилдик. У ҳар бир ўйинда ўйнашни истайди ва умид қиламанки, у Мюнхенда буни уддалай олади", — дея Гвардиоланинг сўзларини келтиради Manchester Evening News.

Жорий мавсумда Канселу “Манчестер Сити” сафида барча турнирлар доирасида 26 та ўйинда майдонга тушиб, 2 та гол урди ва 5 та голли узатмани амалга оширди.

“Бавария” 18 турдан кейин 37 очко билан Бундеслига турнир жадвалида пешқадамлик қилмоқда.