Ўзбекистон футбол ассоциациясида «CAFA Womenʼs Futsal Championship 2023» мусобақасида муваффақиятли иштирок этган Ўзбекистон аёллар футзал терма жамоаси билан учрашув бўлиб ўтди.

Тадбир аввалида ЎФА биринчи вице-президенти Равшан Ирматов футзалчиларимизни ЎФА президенти Абдусалом Азизов, қолаверса, бутун футбол жамоатчилиги номидан мусобақадаги муваффақиятли иштирок билан табриклади. Ушбу натижанинг ортида юртимизда аёллар футболига берилаётган эътибор, қолаверса аҳиллик ва жамоавий меҳнат ётгани таъкидлаб ўтди.

Албатта, бу билан тўхтаб қолмасдан, олдиндаги кўплаб мусобақалар, хусусан, Олимпия ўйинлари саралаш босқичига сифатли тайёргарлик кўриш муҳим. Футзал терма жамоамизнинг кейинги мусобақаларда ҳам муносиб иштирок этишига ишонч билдирилди.

Ўз навбатида, мураббийлар штаби сўнгги йиллардаги аёллар футболига берилаётган эътибор ортганини эътироф этди. Жамоа етакчилари Маҳлиё Сарикова, Саида Галимова ҳам ўз фикр ва таклифларини билдириб ўтишди. Тадбир якунида терма жамоа аъзолари пул мукофотлари билан тақдирландилар.