Сўнгги пайтларда Умид Исоқов қаерда, у нима билан шуғулланмоқда каби саволлар пайдо бўлганди. Мана шундай саволларга жавоб олиш мақсадида Қўқон шаҳрига бориб, 34 ёшли собиқ футболчи билан суҳбатлашишга муваффақ бўлдик.
— Ҳозир нималар билан машғулсиз?
— Фаолиятимни якунлаганимдан сўнг, икки йилдан бери шахсий бизнесимни йўлга қўйдим. Иложи борича футбол ҳақида ўйламасликка ҳаракат қиляпман. Менимча, шундай бўлгани яхшидир.
— Сиз тенги футболчилар ҳамон майдонда жавлон уришмоқда. Масалан, “Нефтчи”даги собиқ жамоадошингиз Анвар Бердиев айни дамда чемпионатимиз тўпурари бўлиб турибди. Нега фаолиятингизни эрта якунлашга қарор қилдингиз? Яна бир нечта мавсум ўйнасангиз бўларди-ку?
— Ҳамма нарсанинг ози ширин. Бундан ташқари, мухлислар Исоқов деганда яхши хотиралар билан эслашларини хоҳлайман. Баъзан футболчилар фаолиятининг сўнгги дамларида омадсизликка учрашади ва мухлислар уларни ёмон кўриб қолишади. Қолаверса, ёшларга имконият беришга аҳд қилдим.
— Жамоалардан таклифлар тушдими?
— Албатта. Бир нечта клублардан таклифлар бўлди. Аммо барчасига рад жавобини бердим. Негаки, менда бунақа одат йўқ. Айтилган сўз — отилган ўқ.
— Менимча, фаолиятингизнинг энг ёрқин дамлари айнан “Нефтчи”да ўтган. Буни инкор этмасангиз керак.
— Сиз ҳақсиз. Мени Исоқов бўлиб танилишимда “Нефтчи” ва Юрий Вазгеновичнинг ҳиссаси катта. Фарғонадаги тўққиз йиллик фаолиятимни ҳеч қачон унутмайман. “Нефтчи” бир умр қалбимда яшайди. У ерда юрагимнинг бир парчаси қолган.
— Нима учун “Нефтчи”дан кетишга қарор қилдингиз?
— Гоҳида шундай пайтлар бўладики, ўз кучингни бошқа жамоада синаб кўриш истаги ўйғонади. Шунинг учун “Пахтакор”нинг таклифи қабул қилганман.
— Биласизми, негадир “Нефтчи”дан кетган айрим футболчиларнинг кейинги фаолияти омадсиз кечади. Бунинг сабаби нимада деб ўйлайсиз?
— Мен ҳам шунга ҳайронман. Ўзим ҳақимда айтадиган бўлсам, кўп ҳолларда борган жамоамда мураббийлар алмашган ва ўша мутахассис ўз ишонган футболчиларини майдонга туширарди. Биз эса захирада қолиб кетардик. “Нефтчи”да эса 26 йилдан бери Юрий Вазгенович бош мураббий бўлиб ишламоқда. Бундан ташқари, футболчи учун янги муҳитга мослашишга вақт керак.
— Ўтган йиллар давомида “Нефтчи”ни кўплаб футболчилар тарк этишган. Аммо уларнинг аксариятига жамоага қайтиш насиб этмаган. Тўғироғи, фақат ягоналарни Саркисян “Нефтчи”га қайтарган. Улар орасида сиз ҳам бор?
— “Нефтчи”да кетгач, фаолиятимни якунлаш учун яна Фарғонага келишни ният қилганимда. Биласиз, жаҳон футболи юдлузлари ҳам фаолиятларининг сўнгги дамини ўзининг энг ёрқин онлари ўтган клубда ўтказишади. Бунга Шевченко мисол бўла олади. 2010 йилги мавсум арафасида Юрий Вазгенович билан суҳбатлашдим. У кишига ниятимни айтганимдан кейин мени “Нефтчи”га қайтишимга имконият берди.
— Ўзбекистондаги энг яхши мураббий сифатида айнан Саркисянни тан олсангиз керак?
— Албатта. Юрий Вазгенович майдон ташқарисида ҳам жуда меҳрибон. Лекин кўпчилик уни ёқтирмайди. Менимча, бунга сабаб Саркисянинг қаттиққўлиги бўлса керак. Бундай инсонлар ҳар кимга ҳам ёқавермайди.
— Терма жамоамиз хусусида нима дея оласиз?
— Бош жамоамиз Жаҳон чемпионати тўртинчи саралаш босқичини омадсиз бошлагани ҳақида эшитдим.
— Бош мураббий алмашгани борасида қандай фикрдасиз?
— Футболда ёзилмаган қоида бор: ғалаба жамоаники, мағлубият учун эса бош мураббий жавоб беради. Худди шундай ҳодиса Абрамов билан ҳам рўй берди. Бундан фожеа ясаш керак эмас. Қосимов масаласига келсак, Миржалол футболчилик даврида ҳам ўзига хос мактаб яратганди. Ўйлайманки, мураббийлик борасида ҳам шундай бўлади.
— Терма жамоамизнинг Жаҳон чемпионатига чиқиш имкониятини қандай баҳолайсиз?
— Футболда бажариб бўлмайдиган шнинг ўзи йўқ. Фақат бироз совуққонлик талаб этилади. Ҳамма ўз ишини сидқидилдан бажариши лозим. Шунда ҳаммаси яхши бўлади.
Аброр Деҳқонов суҳбатлашди
