26 август куни бўлиб ўтган «Машъал» - «Локомотив» баҳсида муборакликлар ўз уйларида ютқазиб қўйишганидан сўнг клуб бош мураббийи Владимир Фомичев ўзини ёмон ҳис қила бошлади. Натижада ўша куни кечқурун соат 23:00да шифокорга кўринишига тўғри келди. Жамоа шифокори Алишер Абдураҳмонов Фомичевни текшириб, бундай ҳолатда ишлаб бўлмаслигини ва зудлик билан қатъий режим асосида даволаниши кераклигини айтди. 

Эртаси куни кечки пайт ёшларимиз машғулот ўтказишлари керак эди, бироқ Фомичевнинг тоби қочганлиги туфайли машғулот бекор қилинди. 28 август куни эса бош мураббийимиз ўзини бироз тетик ҳис қилди, бироқ барибир даволанмаса бўлмаслигини билгач, уйига кетишни лозим топди. Натижада кеча кечки маҳал Владимир Фомичев Муборакдан пойтахт томон йўл олди. Бизга маълум бўлишича, муборакликлар устози бундан буён вақтини соғлигини тиклашга қаратмоқчи. Қозоғистонлик мураббий кетишидан олдин клуб матбуот котибига юраги безовта қилаётганини билдирди ва даволаниши кераклигини айтди. «Машъал» бош мураббийи вақтинча жамоада ишламаётгани туфайли эндиликда футболчиларни унинг ёрдамчиси Александр Хомяков шуғуллантириб туради. Айтиш мумкинки, 3 сентябрь куни бўлиб ўтадиган «Андижон» билан навбатдаги баҳсга жамоани айнан Александр Андреевич тайёрлайди.