"Ювентус" бош мураббийи Массимилиано Аллегри ярим ҳимоячи Поль Погба сешанба куни бўлиб ўтадиган "Торино"га қарши дербида иштирок этиши мумкинлигини айтди.
"Погба ҳозирда анча яхши, у эртага таркибда бўлади. Зарурат туғилса, уни майдонга туширамиз. Аммо у майдонда кўп вақт ўтказа олмайди", - деди Аллегри матбуот анжуманида.
“Бошқа футболчилар билан бўлгани каби Погба билан ҳам гаплашдим. У ҳозир мавсумнинг муҳим қисми эканлигини тушуниши керак ва у жамоага ёрдам беришга ҳаракат қилиши керак”, — дея қўшимча қилди мураббий.
Поль Погба ўтган ёзда "Манчестер Юнайтед" билан шартномаси тугаганидан кейин "Ювентус"га қайтган эди. Жароҳати туфайли француз бу мавсумда ҳали майдонга тушмади.
