«Атлетико Паранаэнсе» ҳужумчиси Витор Роке фаолиятини қайси жамоада давом эттиришни аниқ белгилаб олди.
Бразилиялик футболчи келаси ёзда «Барселона»га ўтиш ниятида.
Sport нашри хабарига кўра, Роке Европанинг бошқа топ-клубларидан келадиган ҳар қандай таклифни рад этишга тайёр. 18 ёшли ҳужумчи ўз агентига фақат «Барселона»га ўтишни хоҳлашини айтди.
Эслатиб ўтамиз, аввалроқ «кўк-анорранглилар» футболчини дастлаб ижарага олиши, кейин эса доимий равишда сотиб олиши мумкинлиги ҳақида хабарлар тарқалган эди.
«Барселона» молиявий фэйр-плей оқибатларисиз ҳам бу келишувни бажара оладими, буни кўриш керак.
